Khadakwasla Canal : खडकवासला कालव्यात मुलगा बुडाला; आठवड्यातील दुसरी घटना

किरकटवाडी - खडकवासला धरणाच्या मागच्या बाजूला कालव्यात तोंड धुण्यासाठी उतरलेला मुलगा बुडाल्याची घटना घडली असून, पुणे महानगर प्रदेश विकास प्राधिकरणाच्या अग्निशमन दलाचे जवान त्याचा शोध घेत आहेत.

शाहिद अल्लाउद्दिन बरोटे (वय 16, रा. येरवडा) असे बुडालेल्या मुलाचे नाव आहे. मागील आठवड्यात याच ठिकाणी जुबेर इस्माईल शेख (वय 26, भवानी पेठ पुणे) याचा बुडून मृत्यू झाला होता. सातत्याने अशा घटना घडत असल्याने सुरक्षेचा प्रश्न ऐरणीवर आला आहे.

शाहिद बरोटे हा मुलगा त्याच्या इतर मित्रांसह सकाळी सिंहगडावर गेला होता. परत येताना ऊन असल्याने चौघेही खडकवासला धरणाच्या मागच्या बाजूला कालव्याजवळ तोंड धुण्यासाठी थांबले. चौघेही कालव्याच्या कडेला तोंड धूत असताना शाहिदचा पाय घसरला व तो खोल पाण्यात गेला. पाण्याला वेग असल्याने काही क्षणांतच तो दिसेनासा झाला.

सोबत असलेल्या इतर तिघांनी आरडाओरड केल्यानंतर इतर लोक मदतीसाठी धावले. हवेली पोलीस ठाण्याचे पोलीस निरीक्षक सचिन वांगडे यांच्या मार्गदर्शनाखाली पोलीस कॉन्स्टेबल शरद चव्हाण व होमगार्ड अनिकेत चोरघे घटनास्थळी दाखल झाले आहेत. पीएमआरडीए चे विभागीय अग्निशमन अधिकारी सुजित पाटील यांच्या मार्गदर्शनाखाली किशोर काळभोर, सुरज माने, योगेश मायनाळे,पंकज माळी, अक्षय तांबे हे जवान शाहिदचा शोध घेत आहेत.