कात्रज नवीन बोगद्यात मोटारगाडीला आग

खेड-शिवापूर - कात्रज नवीन बोगद्यात रविवारी सकाळी अकरा वाजण्याच्या सुमारास एका मोटारगाडीने पेट घेतला. सुदैवाने यात कोणाला काही दुखापत झाली नाही. मात्र बोगद्यातील पंखे आणि दिवे बंद असल्याने बोगद्यात मोठ्या प्रमाणात धुराचे लोट होते. या धुराच्या लोटात आणि अंधारात प्रवाशांना गुदमरल्यासारखे झाल्याने प्रवाशांमध्ये भयावह परिस्थिती निर्माण झाली होती.

याबाबत मिळालेली माहिती अशी की रविवारी सकाळी अकरा वाजण्याच्या सुमारास कात्रज नवीन बोगद्यात (पुण्याहून शिंदेवाडीकडे येताना) मोटारीतील तांत्रिक बिघाडामुळे एका मोटारकारने अचानक पेट घेतला. मोटारीतील चौघे जण ताबडतोब बाहेर पडल्याने कोणाला काही ईजा झाली नाही. मात्र अग्निशामक यंत्रणा येइपर्यंत या आगीत संपूर्ण मोटार जळून खाक झाली. त्यातच बोगद्यातील दिवे आणि पंखे बंद असल्याने बोगद्यात मोठ्या प्रमाणात धूर झाला. अंधार आणि धूर यातून प्रवाशांना वाट काढता येत नसल्याने अनेक प्रवाशांची अवस्था त्या धुरात गुदमरल्यासारखी झाली. त्यामुळे यावेळी बोगद्यात अडकलेल्या प्रवाशांमध्ये भितीचे वातावरण होते. काही वेळात अग्निशामक दलाच्या बंबाने मोटारीची ही आग विझवली.

"बोगद्यात प्रवेश करताना आतमध्ये काय झाले याचा अंदाज येत नव्हता. मात्र अर्ध्या बोगद्याचे अंतर कापून पुढे आल्यावर पेट घेतलेली गाडी दिसली. धुराचा प्रचंड लोट आणि अंधार यामुळे पुढेही आणि मागेही जाता येईना. दुचाकी असल्याने अंदाज घेत घेत आम्ही बोगद्यातून बाहेर पडलो. मात्र तोपर्यंत धुरामुळे गुदमरल्यासारखे झाले होते. बाहेर येईपर्यंत प्रचंड भीती वाटत होती. बोगद्यात पंखे आणि दिवे बंद असल्याने ही परिस्थिती निर्माण झाली," अशी प्रतिक्रिया सूरज नामदे आणि प्रतीक पवार या प्रवाशांनी व्यक्त केली.