Pune : सोसायटीच्या कर्मचाऱ्यांकडून चार लाख रुपयांची फसवणूक

पुणे : शंकरशेठ (shankarsheth) रस्त्यावरील एका सहकारी गृहरचना संस्थेच्या कर्मचाऱ्यांनीच तीन लाख 90 हजार रुपयांची फसवणूक केल्याची घटना घडली आहे. याप्रकरणी सोसायटीच्या दोन कर्मचाऱ्यांविरुद्ध स्वारगेट पोलिस (swarget police) ठाण्यात गुन्हा दाखल करण्यात आला आहे.

आरीफ अब्दुल रज्जाक शेख (वय 38, रा. साईबाबानगर, कोंढवा), नवनाथ महादेव गायकवाड (वय 47, रा. शुक्रवार पेठ) असे गुन्हा दाखल झालेल्यांची नावे आहे. याप्रकरणी आनंद पार्क सोसाटीचे अध्यक्ष पंडीतराव हरी पाटील (वय 70) यांनी स्वारगेट पोलिस ठाण्यात फिर्याद दिली आहे. त्यानुसार ऑक्‍टोंबर 2020 ते मार्च 2021 या कालावधीत ही घटना घडली.

पोलिसांनी दिलेल्या माहितीनुसार, शेख हा आनंद पार्क सोसायटीमध्ये पंप ऑपरेटर म्हणून तर गायकवाड हा वरिष्ठ कारकून म्हणून सोसायटीच्या कार्यालयात काम करीत होते. सोसायटीचा देखभाल खर्च व रंगरंगोटी शुल्क आकारणीची व बॅंकेसंदर्भातील कामे देखील दोघेच करतात. या कामासाठी दोघांना कामासाठी सहा लाख एक हजार रूपये दिले होते. त्यापैकी शिल्लक राहिलेले तीन लाख 90 हजार रूपये या दोघांनी सोसायटीच्या खात्यावर जमा न करता सोसायटीची फसवणूक केल्याचे पदाधिकाऱ्यांच्या लक्षात आले. त्यानंतर सोसायटीच्या पदाधिकाऱ्यांनी चर्चा करून स्वारगेट पोलिसांकडे फिर्याद दिली.