हांडेवाडी चौकाजवळ कचऱ्याचा ट्रक पलटी झाल्याने वाहतूक कोंडी

उंड्री : कात्रज-मंतरवाडी बायपास रस्त्यावर हांडेवाडी चौकाजवळ महापालिकेच्या कचऱ्याचा ट्रक आज (बुधवार, दि. १५ डिसेंबर २०२१) सकाळी साडेनऊच्या सुमारास पलटी झाला. त्यामुळे चार तास वाहतूक ठप्प झाली होती. ट्रकमधील कचरा रस्त्यावर पसरल्याने दुर्गंधीमुळे नागरिकांनी तीव्र संताप व्यक्त केला.दरम्यान, हांडेवाडी वाहतूक विभागातील वाहतूक पोलीस उपनिरीक्षक सुनील जगदाळे, हवालदार संदीप गोवेकर, राहुल लेकावळे, पोलीस नाईक रेश्मा बनकर, अप्पा कोळी यांनी तातडीने घटनास्थळी धाव घेऊन वाहतूक सुरळीत केली.

हांडेवाडी चौकातील गतिरोधक रात्री-अपरात्री अंधारामध्ये दिसत नसल्यामुळे वारंवार अपघात होत आहेत. गतिरोधकावर रिफ्लेक्टर नसल्यामुळे कात्रजकडून येणारी वाहने जोरात येतात आणि गतिरोधकावर आदळून जीवघेणे अपघात होत असल्याने स्थानिक नागरिक कमालीचे त्रासले आहेत. या ठिकाणी रस्त्यातील दुभाजकाला कटर असून येथे ब्लिंकर बसविण्याची गरज आहे, असे धनंजय हांडे यांनी सांगितले.