Pune : दहावी-बारावीच्या पुरवणी परीक्षेचे प्रवेशपत्र बुधवारपासून मिळणार

Pune - महाराष्ट्र राज्य माध्यमिक व उच्च माध्यमिक शिक्षण मंडळातर्फे दहावी-बारावीच्या ‘जुलै-ऑगस्ट २०२३’मध्ये होणाऱ्या पुरवणी परीक्षेची प्रवेशपत्र (हॉल तिकिट) बुधवारपासून (ता.५) उपलब्ध होणार आहेत, अशी माहिती महाराष्ट्र राज्य माध्यमिक व उच्च माध्यमिक शिक्षण मंडळाने दिली आहे.

राज्य मंडळाच्या ‘www.mahahsscboard.in’ या संकेतस्थळावर बुधवारी (ता.५) सकाळी अकरा वाजल्यापासून शाळा आणि कनिष्ठ महाविद्यालयांच्या लॉगिनमधून ही प्रवेशपत्र घेता येणार आहेत. काही तांत्रिक अडचण उद्‌भवल्यास माध्यमिक शाळा आणि कनिष्ठ महाविद्यालयांनी विभागीय मंडळाकडे संपर्क साधावा, अशी सूचना राज्य मंडळाच्या सचिव अनुराधा ओक यांनी प्रकटनाद्वारे दिली आहे.

सर्व माध्यमिक व उच्च माध्यमिक शाळा, कनिष्ठ महाविद्यालयांनी दहावी-बारावी परीक्षेची ऑनलाइन प्रवेशपत्रे प्रिंट करून विद्यार्थ्यांना द्यायची आहेत. हे प्रवेशपत्र ऑनलाइन पद्धतीने प्रिटिंग करताना विद्यार्थ्यांकडून त्यासाठी कोणतेही वेगळे शुल्क घेऊ नये. प्रवेशपत्राची प्रिंट काढून त्यावर मुख्याध्यापकांचा, प्राचार्यांचा शिक्का उमटवून स्वाक्षरी करावी, असे ओक यांनी स्पष्ट केले आहे.

प्रवेशपत्रामध्ये विषय आणि माध्यम बदल असतील, तर त्यांच्या दुरूस्त्या माध्यमिक शाळा, कनिष्ठ महाविद्यालयांनी विभागीय मंडळात समक्ष जाऊन करून घ्यायचे आहे. तसेच प्रवेशपत्रातील छायाचित्र, स्वाक्षरी, विद्यार्थ्याचे नाव यात दुरूस्ती असल्यास शाळा/महाविद्यालयांनी त्यांच्या स्तरावर करून त्यांची एक प्रत विभागीय मंडळाकडे त्वरीत पाठवायची आहे.

विद्यार्थ्यांकडून प्रवेशपत्र गहाळ झाल्यास संबंधित शाळा-महाविद्यालयांनी पुन:श्च प्रिंट काढून त्यावर द्वितीय प्रत असा शेरा देऊन विद्यार्थ्यांस प्रवेश पत्र देण्यात यावे, असे राज्य मंडळाने स्पष्ट केले आहे.