Sarasbaug Chowpatty : सारसबाग चौपाटीच्या पुनर्विकासासाठी साडे पाच कोटींचा प्रस्ताव

पुणे : महापालिकेतर्फे सारसबाग चौपाटी येथे वॉकिंग प्लाझा विकसित करण्यात येणार आहे. तेथील खाद्यपदार्थांच्या व्यावसायिकांनी अटीशर्तींवर स्टॉल लावून व्यवसायास परवानगी देण्यात येणार आहे. याचा आराखडा महापालिकेने तयार करण्यात आले असून, याकामासाठी सुमारे ५ कोटी ४० लाख रुपयांचा खर्च येणार आहे. महापालिकेने सारसबाग चौपाटीवर अतिक्रमण कारवाई करून वाढीव क्षेत्र वापरल्याने ५२ स्टॉल सील केले होते. तेथील शेड, टेबल, खुर्च्या जप्त केल्या. व्यावसायिकांना वारंवार सूचना देऊनही नियमांचे पालन होत नसल्याने महापालिकेने ही कारवाई केली होती. अनेक दिवस स्टॉल बंद असल्याने व्यावसायिकांनी यावर कायमस्वरूपी तोडगा काढण्याची मागणी आयुक्तांकडे केली होती.

यावर आयुक्तांनी अधिकाऱ्यांची बैठक घेत सारसबाग चौपाटी येथे अतिक्रमण होऊ नये, नागरिकांना त्रास होऊ नये यादृष्टीने उपाय योजना करण्याचे आदेश दिले होते. त्यानुसार चौपाटीचे सुशोभीकरण, स्टॉलची एक सारखी पण आकर्षक अशी रचना, नागरिकांना चालण्यासह बसण्यासाठी खास जागा असा वॉकिंग प्लाझाचे नियोजन करण्यात आले. वॉकिंग प्लाझा' झाल्यानंतर चौपाटी परिसरात दुचाकी आणि चारचाकी वाहनांना पेशवे उद्यानाजवळ असलेल्या वाहनतळापर्यंतच आपली वाहने नेता येणार आहे. व्यावसायिकांना खुर्च्या आणि समोरील बाजूस छत लावण्यासाठी ठराविक जागा निश्चित करून दिली जाणार आहे. त्यामुळे सारसबागेत येणाऱ्यांना आता या रस्त्यावर मोकळेपणाने वावरता येणार आहे. या आराखड्याचे नुकतेच प्रेझेंटेशन झाले. काही बदल सुचवण्यात आले असून या आराखड्याबाबत सोमवारी बैठक घेऊन त्यास अंतिम स्वरूप देण्यात येणार आहे. अशी माहिती अतिरिक्त आयुक्त रवींद्र बिनवडे यांनी दिली.