सुनील नगरात आग

ज्यूटच्या गोण्या अन् कापसाच्या कचऱ्याने घेतला पेट
एस.पी. एंटरप्रायझेसला आग; सहा बंबांच्या मदतीने नियंत्रण

सोलापूर, ता. २४ : सुनील नगरजवळील गणेशनगर परिसरातील अरुण स्कूलजवळ असलेल्या एस.पी. एंटरप्रायझेसला रविवारी अचानक आग लागली. ज्यूटच्या गोण्या अन् कापसाचा कचरा असल्याने आगीने काही वेळातच रौद्र रूप धारण केले. सहा अग्निशमन बंबांच्या मदतीने पाण्याचा मारा करून आग नियंत्रणात आणण्यात आली. या घटनेत ज्यूटच्या गोण्या, कापसाचा कचरा, यंत्रसामग्री अन् अन्य साहित्य जळून मोठे नुकसान झाले आहे. आग पूर्ण आटोक्यात आल्यानंतर पंचनामा झाल्यानंतर किती नुकसान झाले आहे. याबाबत माहिती मिळणार आहे.

आगीची माहिती मिळताच महापौर विनायक कोंड्याल यांनी घटनास्थळी भेट देऊन पाहणी केली. अग्निशमन दलाचे प्रमुख राकेश साळुंखे यांच्याकडून त्यांनी आगीची स्थिती अन् बचावकार्याची माहिती घेतली. आग पूर्णपणे विझविण्यासाठी आवश्यक यंत्रणा तैनात ठेवण्याच्या सूचना त्यांनी अधिकाऱ्यांना दिल्या. पाण्याचा पुरवठा सुरळीत राहावा, यासाठी खासगी पाण्याच्या टँकरचीही मदत घेण्यात आली.
एस.पी. एंटरप्रायझेसचे मालक पिरजादे यांच्या आस्थापनातील ज्यूटच्या गोण्या अन् कापसाच्या कचऱ्यामुळे आग मोठ्या प्रमाणात भडकली. अग्निशमन दलाच्या जवानांनी धुराच्या लोटांमध्ये शर्थीचे प्रयत्न करून आग आटोक्यात आणली.

सुदैवाने जीवितहानी नाही
या घटनेत कोणालाही दुखापत झाल्याचे वृत्त नाही. आगीचे नेमके कारण अद्याप स्पष्ट झालेले नाही. आगीमुळे झालेल्या नुकसानीची रक्कमही अद्याप निश्चित झालेली नाही. आग पूर्णपणे विझल्यानंतर संबंधित विभागाकडून नुकसानीचा पंचनामा करण्यात येणार असल्याचे प्रशासनाने सांगितले.