डोर्लेवाडी परिसरातील ओढ्या नाल्यांना महापूर

डोर्लेवाडी, ता.२५ : डोर्लेवाडी (ता. बारामती) परिसरात सलग तीन दिवस पडत असलेल्या मुसळधार पावसाने कहर केला आहे. येथील ओढ्या नाल्यांना महापूर आला आहे. तसेच अनेकांच्या घरात पाणी शिरल्याने परिस्थिती बिकट झाली आहे.
डोलेवाडीत दोनशे मिलिमीटरहून अधिक पाऊस पडला. त्यामुळे शेतीचे मोठ्या प्रमाणात नुकसान झाले आहे. शेतीतून मोठ्या प्रमाणात पाणी बाहेर पडत आहे. डोर्लेवाडीतील लहान चारी मोठी चारी या दोन्ही ओढ्यांना पूर आल्याने बारामती सोनगाव या मुख्य रस्त्यावरून मोठ्या प्रमाणात पाणी वाहत आहे. या परिसरातील साळे वस्ती, बोराटे वस्ती, दूध संकलन केंद्र हा संपूर्ण परिसर पाण्याखाली गेला आहे. अनेक घरांमध्ये पावसाचे पाणी शिरले आहे. गेले तीन दिवसापासून पावसाची संततधार चालू असल्यामुळे सर्वसामान्य नागरिक व शेतकऱ्यांचे जनजीवन विस्कळित झाले आहे.
मागील तीन ते चार वर्षांपासून जलसंपदा विभागाकडे मागणी करूनही चाऱ्यांची स्वच्छता व खोलीकरण करण्यात न आल्यामुळे नागरिकांच्या घरात पाणी शिरले असल्याने नागरिकांनी संताप व्यक्त केला. दरम्यान, मागील आठवड्यामध्येच छत्रपती कारखान्याच्या निवडणुकीदरम्यान उपमुख्यमंत्री अजित पवार यांची डोर्लेवाडीत सभा झाली असताना येथील शेतकऱ्यांनी व ग्रामपंचायतीच्या वतीने चाऱ्यांची स्वच्छता करण्याबाबत निवेदन दिले होते. बारामती मेखळी रोडला चारीच्या पुलावरील पाइप टाकण्याचे काम सुरू आहे ते काम पूर्ण न झाल्याने त्याचाही परिणाम पाण्याच्या वाहतुकीला झाला आहे.

डोर्लेवाडीग्रामपंचायतीच्या वतीने जलसंपदा विभाग यांना तातडीची व्यवस्था करण्याचे कळविण्यात आले आहे. शिवाय बाधित नागरिकांना प्राथमिक शाळा येथे तात्पुरते स्थलांतरित करण्याचे नियोजन करण्यात आल्याची माहिती सरपंच सुप्रिया सुळे नाळे व ग्रामविकास अधिकारी रामचंद्र कारंडे सांगितले.

मागील ५० वर्षात मे महिन्यात व पावसाळ्याच्या सुरवातीला एवढा पाऊस कधीच झाला नव्हता.जलसंपदा विभाग व ग्रामपंचायतीने चाऱ्यांची दुरुस्ती व स्वच्छता करण्याच्या कामाकडे दुर्लक्ष केल्यामुळे आमच्या इतर कुटुंबियांच्या घरात पाणी शिरते आहे. तातडीने चाऱ्यांची दुरुस्ती व रस्त्याच्यावर पाइप टाकावेत.
- शंकर साळे, नागरिक

01087