कुरणला विद्यार्थ्यांना कायदेविषयक मार्गदर्शन

जुन्नर, ता. १६ : कुरण (ता. जुन्नर) येथे बुधवारी (ता. १५) जयहिंद कॉलेज ऑफ इंजिनिअरिंगच्या विद्यार्थ्यांसाठी मोफत कायदेविषयक शिबीराचे आयोजन केले होते. जुन्नर तालुका विधी सेवा समितीचे प्रभारी अध्यक्ष ए. एम. हुसेन यांच्या मार्गदर्शनाखाली सह-दिवाणी न्यायाधीश नम्रता बिरादार यांच्या अध्यक्षतेखाली शिबिर पार पडले.
यावेळी ॲड. हेमंत हडवळे यांनी पोस्को कायद्याबद्दल जागरूकता या विषयावर मार्गदर्शन केले. नालसाच्या राष्ट्रीय कायदेशीर मदत हेल्पलाइन क्रमांक व नालसा पोर्टलची माहिती प्रसिद्ध करणे याबाबत ॲड. रणजित भगत यांनी माहिती दिली. ॲड. आरती नलावडे यांनी कामाच्या ठिकाणी महिलांच्या लैंगिक छळासंदर्भातील तरतुदींबद्दल अधिकारी, व्यवस्थापन, मालक, कर्मचारी व किशोरवयीन गटांना जागरूक केले. ॲड. मंजिरी कोल्हे यांनी नालसा ड्रग्ज अमली पदार्थ गैरवापर बळींसाठी कायदेशीर सेवा आणि ड्रग्ज निर्मूलन योजना २०१५ विषयी माहिती दिली. ॲड. निर्णया गाडेकर यांनी समाजातील महिलांची सुरक्षितता आणि गोपनीयता याबद्दल जागरूकता केली. नालसा मुलांसाठी कायदेशीर सेवा योजना २०२४ या विषयावर ॲड. संजय उकिर्डे यांनी मार्गदर्शन केले.