कोंढापुरी, तळेगाव ढमढेरेत आढळले बिबटे मृत

तळेगाव ढमढेरे, ता. ४ : शिरूर तालुक्यातील कोंढापुरी व तळेगाव ढमढेरे येथील उसाच्या शेतात शनिवारी दोन मादी बिबटे मृतावस्थेत आढळले. वनविभागाने दोन्ही बिबट्यांचा ताबा घेऊन शवविच्छेदनानंतर त्यांचे दहन केले. या घटनेमुळे परिसरात खळबळ उडाली आहे.
कोंढापुरी येथील सुभाष गायकवाड आणि तळेगाव ढमढेरे येथील अरुण भुजबळ यांच्या शेतात ऊस तोडणी सुरू असताना हे बिबटे मृतावस्थेत सापडले. वनपरिक्षेत्र अधिकारी निळकंठ गव्हाणे यांच्या सूचनेनुसार वनपाल गौरी हिंगणे, वनरक्षक प्रमोद पाटील आणि वन्यजीव बचाव पथकाने घटनास्थळी धाव घेतली.पशुवैद्यकीय अधिकारी डॉ. गोविंद राठोड यांनी दोन्ही मादी बिबट्यांचे शवविच्छेदन केले. त्यानंतर वनविभागाच्या नियमानुसार त्यांचे दहन करण्यात आल्याची माहिती निळकंठ गव्हाणे यांनी दिली.