वर्षभर फरारी आरोपी पोलिसांच्या ताब्यात

पुणे, ता. २४ : महाराष्ट्र संघटित गुन्हेगारी नियंत्रण कायद्यान्वये (मकोका) कारवाई केल्यानंतर वर्षभर फरार झालेल्या अल्पवयीन मुलास गुन्हे शाखेच्या पथकाने ताब्यात घेतले. खुनाचा प्रयत्न केल्याप्रकरणी संबंधितावर कारवाई करण्यात आली.
मागील वर्षी २२ जुलै रोजी मंगळवार पेठेतील मोदी पेट्रोल पंपाजवळ टोळक्याने एका तरुणावर धारदार शस्त्राने वार करून खुनाचा प्रयत्न केला होता. या गुन्ह्यातील आरोपी सराईत गुन्हेगार होते. दरम्यान, फरासखाना पोलिसांनी सहा जणांना अटक करून त्यांच्याविरुद्ध ‘मकोका’नुसार कारवाई करण्यात आली होती. या कारवाईनंतर सराइतांबरोबर असलेला अल्पवयीन साथीदार मागील एक वर्षापासून पसार झाला होता. त्याच्या मागावर असणाऱ्या पोलिसांना तो नाना पेठेत एका मित्राला भेटण्यासाठी येणार असल्याची खबर गुन्हे शाखेच्या युनिट एकमधील पोलिस कर्मचारी नीलेश साबळे व शुभम देसाई यांना मिळाली. त्यानुसार पोलिसांच्या पथकाने सापळा लावून त्यास ताब्यात घेतले. त्यानंतर त्यास फरासखाना पोलिसांच्या ताब्यात देण्यात आले आहे. पोलिस निरीक्षक कुमार घाडगे, सहायक निरीक्षक दीपक बर्गे, विनोद शिंदे, नीलेश साबळे, शुभम देसाई यांच्या पथकाने ही कारवाई केली.