सनबर्न फेस्टिव्हल रद्द करण्याची मागणी

पुणे, ता. ८ : नाताळच्या पार्श्वभूमीवर मुंबईत १९ ते २१ डिसेंबर या कालावधीत होणारा ‘सनबर्न फेस्टिव्हल’ युवा पिढीला अमली पदार्थांच्या गर्तेत ढकलणारा आहे. त्यामुळे हा कार्यक्रम रद्द करा, व्यसनाधीनता वाढविणाऱ्या अशा कार्यक्रमांवर बंदी घाला, अशी मागणी नशा विरोधी संघर्ष अभियानाचे माहिती सेवा समितीचे अध्यक्ष चंद्रकांत वारघडे यांनी पत्रकार परिषद केली.

सनबर्न फेस्टिव्हलच्या आयोजकांनी २००९, २०१४ आणि २०२० मध्ये गोवा राज्याचा कोट्यवधींचा कर बुडवला होता. या संदर्भात सप्टेंबर २०२५ मध्ये मुंबई उच्च न्यायालयाने ‘सनबर्न फेस्टिव्हल’ची सुरक्षा ठेव रक्कम जप्त करण्याचा आदेश दिला होता. अमली पदार्थांचा धोका असलेला हा फेस्टिव्हल कायमस्वरूपी रद्द करावा, अशी मागणी वारघडे यांनी केली. या वेळी व्यसनमुक्त युवकसंघाचे मार्गदर्शक भानुदास वैराट, मुग्धा बिवलकर, ऋतुजा माने, प्राची शिंत्रे आदी उपस्थित होते.