आदिवासी कलाकारांसाठीचा ‘सुंबा आर्टफेस्ट’ रविवारपासून

पुणे, ता. ८ ः सुंबरान आर्ट फाउंडेशनतर्फे आदिवासी कलाकारांना व्यासपीठ देण्यासाठी ‘सुंबा आर्टफेस्ट २०२५’चे आयोजन करण्यात आले आहे. हा महोत्सव १५ ते २२ डिसेंबर या कालावधीत सकाळी ११ ते रात्री ८ या वेळेत घोले रस्त्यावरील पं. जवाहरलाल नेहरू सांस्कृतिक भवनात होणार आहे.
चित्रकार प्रा. रावसाहेब गुरव यांच्या स्मरणार्थ हा महोत्सव आयोजित केला जात असल्याची माहिती चैत्र समूहाच्या व्यवस्थापकीय संचालक चित्रा मेटे यांनी सोमवारी पत्रकार परिषदेत दिली. याप्रसंगी डॉ. सुधाकर चव्हाण, डॉ. गिरीश रांगणेकर, श्रीकृष्ण परांजपे, शिल्पा बारभाई आदी उपस्थित होते. या उत्सवातील ‘सुंबा बाजार’ विभागात आदिवासी कलाकारांचे सादरीकरण, थेट कलानिर्मिती, विक्री आणि कलाकारांशी संवाद साधण्याची संधी मिळणार आहे. ‘सुंबा सभा’ या विभागात चर्चा, अनुभवकथन आणि कलाप्रवास उलगडणार आहे. ‘सुंबा सन्माना’अंतर्गत आदिवासी कलांच्या क्षेत्रात मोलाचे योगदान देणाऱ्या कलाकारांचा सन्मान केला जाणार आहे. दिवंगत चित्रकार प्रा. रावसाहेब गुरव यांच्या लोकप्रिय चित्रांचे प्रदर्शनदेखील महोत्सवात आयोजित करण्यात आले आहे. सुलेखनकार अच्युत पालव आणि चित्रकार वासुदेव कामत यांचे सादरीकरण, हे महोत्सवाचे विशेष आकर्षण आहे.