मेक्सिकोत ट्रकचा भीषण अपघात; 49 जणांचा मृत्यू, 58 जण जखमी

मेक्सिकोमध्ये (Mexico) गुरुवारी रात्री उशिरा दोन ट्रकमध्ये भीषण अपघात झाला. चियापासमधील (Chiapas) दक्षिण-पूर्व मेक्सिकन शहर तुक्स्टला गुटिरेझजवळ दोन ट्रकची जोरदार धडक होऊन झालेल्या भीषण अपघातात 49 जण ठार, तर 58 जण जखमी झाले आहेत. बचाव पथकानं (Mexico Rescue squad) ही माहिती दिलीय.

या भीषण अपघातातील एका ट्रकमध्ये मध्य अमेरिकेतील 100 हून अधिक प्रवासी होते. प्राथमिक माहितीनुसार, या अपघातात 58 जण जखमी झाले असून, त्यापैकी तीन जण गंभीर जखमी आहेत. त्यांना शहरातील रुग्णालयात दाखल करण्यात आले आहे. या अपघातात 49 जणांचा मृत्यू झाल्याची माहिती बचाव पथकानं गुरुवारी रात्री उशिरा फेसबुकवर दिलीय.

चियापासचे गव्हर्नर रटिलियो एस्कंडन (Governor Ratilio Eskandon) यांनी पीडितांच्या कुटुंबीयांप्रति दु:ख व्यक्त केलंय. या अपघातासाठी जबाबदार असलेल्यांवर कडक कारवाई करण्याचं आश्वासनही त्यांनी दिलंय. अद्याप या मृतांची कोणतीही ओळख पटलेली नाही. शवविच्छेदन अहवाल आल्यानंतरच, मृतदेह नातेवाईकांच्या ताब्यात देण्यात येणार असल्याचं समजतंय.