मलायका अरोरासारखं उत्कटासन करायचंय? जाणून घ्या फायदे

योगासनांचे आपल्या शरीराला होणारे फायदे खूप आहेत. चाळीशीनंतर फिट राहायचं असेल तर अनेकजण योग करण्याला पसंती देतात. त्यात मलायका अरोरा मागे नाही. मलायका रात्री उशीरापर्यंत जरी पार्टी करत असली तरी सकाळी उठून ती योगासने करण्याला महत्व देते. म्हणून तर 48 व्या वर्षीही ती अतिशय फिट आहे. ती अनेकदा सोमवारी तिच्या वर्कआऊटचे व्हिडिओ सोशल मिडियावर टाकत असते. 'मलायकाज मुव्ह ऑफ द विक' मध्ये तिने उत्कटासन करतानाचा व्हिडिओ शेअर केला आहे.

असे करा आसन

एका आसनावर तुमच्या दोन्ही पायांमध्ये काही अंतर ठेऊन सरळ उभे राहा. त्यानंतर तुमचे दोन्ही हात समोर लांबवून खांद्याला समांतर राहतील असे ठेवा. तळहात जमिनीकडे असतील याची काळजी घ्या. त्यानंतर खुर्चीमध्ये बसताना जसे वाकतो तसे वाका. या स्थितीत तुम्हाला 10 ते 15 सेकंद राहायचे आहे. हि कृती करत असताना श्वासोश्वास निमित्त चालू राहू द्या. असे करताना तुमचे नितंब मागच्या बाजूला जाईल तसेच गुडघे हे पायांच्या तळव्याच्या पुढे जाणार नाहीत तसेच तुमच्या मांड्या पोटऱ्यांना स्पर्श करणार नाहीत याचीही काळजी घ्या. हे आसन दोन ते 3 वेळा करावे. मात्र ज्यांना गुडघ्यांचा, कमरेचा किंवा घोट्यांचा काही त्रास असेल त्यांनी हे आसन करू नये.

असे आहेत फायदे

- या आसनाचा नियमित सराव केल्यास आपल्या मांड्यांचे व पोटऱ्यांचे स्नायू मजबूत बनतात.

-पाठीच्या, कमरेच्या भागावर ताण पडून तेथील स्नायूही मजबूत बनतात.

- हे आसन नियमित केल्यास पोट सुटत नाही.

- हे आसन करताना शारीरिक तोल सांभाळावा लागतो म्हणून याला तोलासन म्हणतात. हे आसन केल्याने मन शांत होते, स्थिरावते.

- आसनाच्या नियमित सरावामुळे शरीर हलके होते व आपला उत्साह वाढतो.