सावधान ! खोटा पासधारक आढळल्यास होणार ही कारवाई....

मालवण (सिंधुदुर्ग) : मुंबई, पुणेसह  राज्याच्या विविध भागातून चाकरमानी वेगवेगळ्या कारणांनी पासेस घेऊन गावांमध्ये दाखल होत आहेत. मात्र काहींनी चुकीची  कारणे देत पासेस घेतल्याचे निदर्शनास आले आहे. या अनुषंगाने तालुक्यात आलेल्या पासधारकांची पडताळणी करून खोटी माहिती देऊन आलेल्या संबंधितांवर फौजदारी गुन्हा दाखल केला जाणार असल्याचा इशारा पंचायत समिती प्रशासनाने दिला आहे. याबाबतचे परिपत्रक कार्यवाहीसाठी उपमुख्य कार्यकारी अधिकारी तथा गटविकास अधिकारी राजेंद्र पराडकर यांनी सरपंच, ग्रामविकास अधिकारी, ग्रामसेवक यांना पाठविले आहे. 

गटविकास अधिकाऱ्यांनी काढलेल्या आदेशात म्हटले आहे की, ७ मे पासून राज्यातून व राज्याबाहेरून येणाऱ्या लोकांची संस्थात्मक विलगीकरण करण्याची व्यवस्था ग्रामपंचायत स्तरावर स्थापित ग्राम नियंत्रण समितीने केली आहे. जे लोक परजिल्ह्यातून व परराज्यातून येत आहेत, त्यांना ग्रामपंचायत स्तरावर स्थापित संस्थात्मक विलगीकरण अथवा गृह विलीगीकरण मध्ये ठेवले जात आहे. परंतु शासनाने उपलब्ध केलेल्या वैधमार्गाने येत असलेल्या व्यक्तींनी प्रवेश मिळवण्यासाठी जे कारण नमूद केले जाते, त्यामध्ये तफावत असल्याची बाब काही ठिकाणी सरपंच तसेच समिती सदस्यांनी निदर्शनास आणून दिली आहे. 

हेही वाचा- तुम्हाला सतत तहान लागते का ...? मग वाचाच                                                                                           त्यामुळे अशा व्यक्तीवर कोणती कारवाई करावी ? अशी विचारणा सरपंचांकडून होत आहे. त्यानुसार जे लोक परजिल्ह्यातील व परराज्यातून शासनाने अधिकृत केलेला प्रवेश पास घेऊन जिल्ह्यात तसेच त्यानंतर संबंधित ग्रामपंचायत स्तरावर विलगीकरण करण्यासाठी पाठविले जातात, त्यांच्या पासेसची पडताळणी करण्यात यावी. त्याने नमूद केलेले कारण है वैध आहे का, याची खात्री करावी व दिलेले कारण हे समितीतीस योग्य आहे कि अयोग्य याबाबत निर्णय घेऊन अशा व्यक्ती बाबत शासनाची फसवणूक केल्याबाबत समितीचे मत झाल्यास नियमानुसार कारवाई प्रस्तावित करण्यात यावी, असे आदेश देण्यात आले आहेत.