राजापूर ःमहावितरण विभागाचा कागदावरील सज्जतेचा बोजवारा

rat24p10.jpg-
66166
राजापूरः जवाहरचौक परिसरातील धोकादायक झालेला विजेचा खांब.
-----------
महावितरणच्या कागदावरच्या सज्जतेची पोलखोल
राजापुरात अनेक गावे अंधारात; पंप बंद असल्याने टंचाई
सकाळ वृत्तसेवा
राजापूर, ता. २४ : गेल्या आठ-दहा दिवसांपासून तालुक्यामध्ये सातत्याने मान्सूनपूर्व पावसाचा जोर कायम आहे. मान्सूनपूर्व पावसाच्या तडाख्यामध्ये कुठेही पडझड होऊन नुकसान झाले नसले तरी, महावितरण विभागाच्या कागदावरील सज्जतेचा बोजवारा उडाला आहे. अनेक गावांमधील वीज गायब झाल्याने त्या गावांमधील लोकांचा पिण्याच्या पाण्याचा प्रश्‍न निर्माण झाला आहे. खंडित वीजपुरवठा कार्यान्वित करण्याचे काम महावितरण विभागाकडून युद्धपातळीवर सुरू आहे.
गेले आठ दिवस मान्सूनपूर्व पाऊस पडत आहे. त्यामुळे नदी-नाले पुन्हा प्रवाहित झाले आहेत. मान्सूनपूर्व पावसासोबत वादळाचाही तडाखा बसल्याने साखरीनाटे बंदरातील मासेमारी ठप्प आहे. मच्छीमार बांधवांनी होड्या उभ्या करून ठेवल्या आहेत. खरीप हंगामापूर्वी शेतीच्या मशागतीची करण्यात येणारी कामेही मान्सूनपूर्व पावसाच्या तडाख्यामुळे ठप्प झाली आहेत. मान्सूनपूर्व पावसाच्या या तडाख्यामध्ये जवळेथर येथे वीज पडल्याच्या घडलेल्या घटनेव्यतिरिक्त कुठेही पडझड होऊन नुकसान झालेले नाही; मात्र गावागावांमधील वीज गायब झाल्याने लोकांना अंधारातच राहावे लागत आहे.
पावसाळ्यातील संभाव्य आपत्तीच्या अनुषंगाने तालुक्यामध्ये झालेल्या प्रशासकीय नैसर्गिक आपत्ती आढावा बैठकीमध्ये महावितरण विभागासह सर्वच विभाग संभाव्य नैसर्गिक आपत्तीला सामोरे जाण्यासाठी सज्ज असल्याचे स्पष्ट केले होते; मात्र मान्सूनपूर्व पावसाने महावितरणच्या सज्जतेची निसर्गाने पोलखोल झाली. अनेक भागातील वाहिन्यांमध्ये दोष निर्माण झाला असून, वीजपुरवठा खंडित झाला आहे. त्यामुळे गावे दोन-तीन दिवस काळोखात आहेत. वीजपंप बंद राहिल्याने गावांमधील लोकांना भरपावसामध्ये पाणीटंचाईला सामोरे जावे लागले आहे.