58692
नेरूरपारमध्ये आरोग्य चिकित्सा,
ग्रामस्थांना मोफत औषधे वाटप
कुडाळ, ता. २२ : ‘‘ग्रामीण भागातील नागरिकांच्या आरोग्याची काळजी घेण्यासाठी मोफत आरोग्य शिबिर अशा प्रकारच्या उपक्रमांची अत्यंत गरज आहे. भविष्यातही सामाजिक हिताचे उपक्रम राबवले जातील,’’ असा विश्वास जिल्हा परिषद सदस्य रुपेश पावसकर यांनी व्यक्त केला.
‘माझे गाव-आरोग्यसंपन्न गाव’ अभियानांतर्गत नेरूरपार येथे आयोजित मोफत आरोग्य तपासणी शिबिराला ग्रामस्थांचा उत्स्फूर्त प्रतिसाद होता. जिल्हा परिषद सदस्य पावसकर यांच्या विशेष उपस्थितीत हे शिबिर झाले. हे आरोग्य शिबिर वसुंधरा विज्ञान केंद्र, नेरूरपार येथे घेण्यात आले. या शिबिरात विविध आरोग्य तपासण्या करण्यात आल्या. तसेच मोफत औषध वाटप केले. शुक्रतारा कला क्रीडा मंडळ (नेरूरपार), वसुंधरा सार्वजनिक विश्वस्त न्यास (नेरूरपार), कोकण कला व शिक्षण विकास संस्था, ग्रामपंचायत नेरूर देऊळवाडा आणि आयुष्मान आरोग्य मंदिर (नेरूर क्र. २) यांच्या संयुक्त विद्यमाने हे शिबिर झाले.
