India vs England 1st ODI: चॅम्पियन्स ट्रॉफीच्या तयारीच्या दृष्टीने महत्त्वाच्या असलेल्या भारत-इंग्लंड वन डे मालिकेत पहिल्याच सामन्यात कर्णधार रोहित शर्मा अपयशी ठरला. ७ चेंडूंचा सामना करून रोहित अवघ्या दोन धावांवर माघारी परतला. पण, शुभमन गिल, श्रेयस अय्यर व अक्षर पटेल यांनी उपयुक्तता सिद्ध करताना भारताला मालिकेत १-० अशी आघाडी मिळवून दिली आहे. नागपूर येथे झालेल्या सामन्यात इंग्लंडचा संघ २४८ धावांत तंबूत परतला. पदार्पणवीर हर्षित राणा व रवींद्र जडेजा यांनी प्रत्येकी ३ विकेट्स घेतल्या. त्यानंतर गिल, अय्यर व पटेल यांच्या अर्धशतकांनी भारताला ६८ चेंडू व ४ विकेट्स राखून विजय मिळवून दिला.
