नशिबाची थट्टा! नॅशनल लेव्हलच्या बॉक्सरवर आली रिक्षा चालवायची वेळ

वाईट वेळ आणि परिस्थिती कधी कोणत्या क्षणी ओढावेल याचा काही नेम नसतो. सध्याच्या काळात ही परिस्थिती अनेकांवर आल्याचं दिसून येत आहे. कोरोना विषाणूने घातलेल्या थैमानामुळे अनेक राज्यांमध्ये लॉकडाउन करण्यात आला आहे. त्यामुळे अनेक जणांचे उद्योग-व्यवसाय ठप्प झाले आहेत. परिणामी, अनेकांवर उपासमार व बेरोजगारीची वेळ आली आहे. यात राष्ट्रीय स्तरावर खेळणाऱ्या एका बॉक्सरवरदेखील वाईट वेळ आली आहे. एकेकाळी राष्ट्राचं नाव उज्ज्वल करणाऱ्या या बॉक्सरवर चक्क रिक्षा चालवण्याची वेळ आली आहे.

पंजाबमधील आबिद खान या बॉक्सरची सध्या सोशल मीडियावर चर्चा रंगली आहे. युट्यूबवर आबिद खान यांचा एक व्हिडीओ शेअर करण्यात आला आहे. या व्हिडीओमध्ये त्याच्यावर ओढावलेल्या परिस्थितीचं कथन करण्यात आलं आहे.

हेही वाचा : ३० एप्रिलपर्यंत देशात कडक लॉकडाउन?

आबिद खान नॅशनल लेव्हलचे बॉक्सर असून त्यांनी पाच वर्ष सैन्यात प्रशिक्षक पदावरही काम केलं आहे. मात्र, सध्या त्यांच्यावर रिक्षा चालवण्याची व बाजारात हमाली करण्याची वेळ आली आहे.

पंजाब विद्यापीठातून शिक्षण पूर्ण केलेले आबिद खान सध्या पंजाबमध्येच रिक्षा चालवत आहे. घरची परिस्थिती हालाखीची असल्यामुळे या आर्थिक तंगीतून मार्ग काढण्यासाठी त्यांनी रिक्षा चालवण्याचा निर्णय घेतला. त्यानुसार, आता ते रिक्षा चालवून कुटुंबाचा उदनिर्वाह करत आहेत. बॉक्सिंगची आवड असूनदेखील कर्तव्यापोटी त्यांना त्यांच्या स्वप्नांना मुरड घालावी लागली आहे. विशेष म्हणजे देशासाठी योगदान देणाऱ्या आबिद यांना त्यांच्या संकट काळात शासनाकडून कोणतीही मदत मिळाली नाही. त्यामुळे त्यांनी त्यांच्या मुलांनादेखील स्पोर्ट्स जॉइन करण्यास सक्त मनाई केली आहे.

आबिद खान यांना दोन मुलं असून त्यांनी मुलांना स्पोर्ट्स जॉइन करण्यास स्पष्ट नकार दिला आहे. तसंच सध्या त्यांना पुन्हा बॉक्सिंगचे कोचिंग क्लासेस सुरु करण्याची इच्छा आहे. मात्र, पैशाअभावी त्यांचं हे स्वप्न अपूर्ण राहिलं आहे.