Konkan Lok Sabha Elections : 'कोकणचा कॅलिफोर्निया होऊ दे रे म्हाराजा...'

Lok Sabha Elections : सध्या निवडणुकीचा कालावधी जसा जवळ येत आहे तसे राजकीय वर्तुळात बदल घडत आहेत. जिल्ह्यात मतदारांमध्ये सल्लामसलत सुरूच आहे. शासनातर्फे मतदान हक्कासाठी गावोगावी मतदारांसमोर जनजागृती केली जात आहे. मतदान हे सर्वश्रेष्ठ हक्क आहे आणि तो प्रत्येक नागरिकाने बजावला पाहिजे, असा आशावाद निर्माण करण्यात येत आहे.

एकीकडे ग्रामीण भागांत विकासाच्या वाटा चोखाळल्या गेल्या आहेत. त्याच भागातील कार्यकर्त्यांचे म्हणणे मतदारांपर्यंत पोचत आहे. पण, ज्या दुर्गम भागात विकास झाला नाही त्या त्या ठिकाणी नाराजीचे सूर उमटत आहेत. मतदान करायचे की नाही आणि ते कुणाला? असाच संभ्रम निर्माण झाला आहे. यावर मात करण्यासाठी नव्या दमाच्या युवा पिढीने मतदानाचा हक्क आणि मतदान जनजागृती यावर घराघरात जाऊन माहिती देणे महत्वाचे झाले आहे.

विविध पक्षांकडून मतदार बंधू संबोधला जातोय. त्याच्यासमोर विकासाचा लेखाजोखा टाकला जात आहे. आम्ही अमूक करणार तमूक करणार. पण, खुर्ची मिळाली की मतदार कुठेही दिसत नाही. सध्या ग्रामीण भागात रात्री पारावार होणाऱ्या चर्चांना ऊत आला आहे. मतदार आपले म्हणणे मांडत आहे. चार टोळकी एकत्र येऊन गावातील रस्ता, पाणी, वीज यावर चर्चा करतात.

गावातील तात्या गावकार शिमगोत्सवात देवाला गाऱ्हाणं घालतानाही म्हणतोय कोकणचा कॅलिफोर्निया (California) दहा वर्षांत झाला नाही. या पुढे तरी होऊ दे रे म्हाराजा... अशी मागणी देवाजवळ करतोय. देवाजवळ मागणी तर केली जातय, पण कोकणचा कॅलिफोर्निया करण्यासाठी यापूर्वी निवडणुकांमधून झालेल्या घोषणा आणि आता होणाऱ्या घोषणा कागदावर न राहता त्या प्रत्यक्षात येतील?