Sanjay Raut : "संजय राऊतांचं १० मिनिटं संरक्षण काढा, ते परत दिसणार नाहीत"; नितेश राणेंनी धमकावलं

खासदार संजय राऊत यांच्या वक्तव्यामुळे अर्थसंकल्पीय अधिवेशनाचा आजचा दिवस चांगलाच गाजला. राज्याचं विधिमंडळ हे चोरमंडळ आहे, असं विधान राऊतांनी केलं आणि मोठा गदारोळ माजला. भर अधिवेशनामध्ये भाजपा आमदार नितेश राणे यांनी संजय राऊतांना यावरुन धमकावलं आहे.

अर्थसंकल्पीय अधिवेशनाच्या आजच्या दिवसात विविध पक्षीय नेत्यांनी संजय राऊत यांच्या वक्तव्याचा निषेध केला. तर संजय राऊत यांच्यावर हक्कभंगाचा प्रस्तावही आणला. या सगळ्या दरम्यान भाजपा आमदार नितेश राणे यांनी संजय राऊतांचा एकेरी उल्लेख केला आहे. तसंच त्यांचं १० मिनिटं संरक्षण काढा, ते परत दिसणार नाहीत, अशी धमकीही दिली.

काय म्हणाले नितेश राणे?

आपल्याला रोज सकाळी संजय राऊतांचं ऐकावं लागतं. महाराष्ट्राला याची गरज आहे का? आपण त्यांचं काय घेऊन खाल्लं आहे. राऊतांचा आणि शिवसेनेचा काय संबंध आहे? ते सामनात येण्याआधी त्यांचे सगळे लेख शिवसेनेच्या विरोधात होते. तेव्हा त्यांची एवढी हिंमत झालेली की, हिंदुहृदयसम्राट बाळासाहेब ठाकरेंच्या विरोधात लिहिलं, शिवसेनेच्या विरोधात लिहिलं होतं.

संजय राऊतांना धमकावताना नितेश राणे पुढे म्हणाले, "संजय राऊतांना दिलेलं संरक्षण काढा. ते पोलिसांचं संरक्षण घेऊन फिरतात, सरकारनं दिलेलं संरक्षण आहे ते. १० मिनिटे ते संरक्षण काढायला सांगा, ते उद्या सकाळी परत दिसणार नाही, एवढा शब्द देतो."