India Who Lit the Fuse : ‘हू लिट द फ्यूज?’ च्या प्रसारणावर कोर्टाची बंदी

प्रयागराज (उत्तर प्रदेश) : ‘इंडिया...हू लिट द फ्यूज?’ (India Who Lit the Fuse) या वादग्रस्त माहितीपटाच्या प्रसारणावर अलाहाबाद उच्च न्यायालयाने बंदी घातली आहे. या माहितीपटाच्या प्रसारणामुळे देशातील सामाजिक सलोखा बिघडू शकतो, असे न्यायालयाने सांगत बंदी घातली. या चित्रपटाचे कतारच्या अल जजिरा वाहिनीवरून प्रसारण केले जाणार होते. यासंदर्भात जनहित याचिका दाखल झाली होती.

न्यायाधीश अश्‍विनीकुमार मिश्रा आणि न्यायाधीश आशुतोष श्रीवास्तव यांच्या दोन सदस्यीय पीठाने आदेश दिला आहे. अल जजिरा मीडिया नेटवर्क प्रा. लि. वाहिनीला नोटीस बजावत उत्तर मागितले आहे.

तसेच कायदा आणि सुव्यवस्था राखण्याबरोबरच देशातील आणि राज्यातील सामाजिक सलोखा कायम राखण्यासाठी सुरक्षेच्या दृष्टीने पावले उचलावीत असे निर्देशही केंद्र आणि राज्य सरकारला दिले. या खटल्याची पुढची सुनावणी ७ जुलै रोजी होणार आहे. केंद्र सरकार आणि माहिती व प्रसारण मंत्रालयाने योग्य ती खबरदारी घेण्याचेही सांगितले आहे.