औरंगाबाद शहरात एकाच दिवशी ८७ पॉझिटिव्ह

औरंगाबाद : शहरात गेल्या काही दिवसात कोरोना (Corona) संसर्गाच्या रुग्णांची संख्या झपाट्याने वाढत आहे. मंगळवारी (ता. चार) एकाच दिवसात तब्बल ८७ जण कोरोना पॉझिटिव्ह (Corona positive) आढळून आले आहेत. रुग्णांची संख्या वाढत असल्याने तिसरी लाट (third wave) शहराच्या उंबरठ्यावर असल्याचे मानले जात आहे.

कोरोनाच्या ओमीक्रॉन विषाणूमुळे तिसऱ्या लाटेची भीती व्यक्त केली जात आहे. शहरात ओमिक्रॉनच्या रुग्णांची संख्या नियंत्रणात असली तरी कोरोना पॉझिटिव्ह रुग्णांची संख्या झपाट्याने वाढत आहे. रविवारी (ता. दोन) २८, सोमवारी (ता. तीन) २९ तर मंगळवारी पॉझिटिव्ह रुग्णांची संख्या ८७ वर गेली आहे. अचानक कोरोना रुग्ण संख्येत वाढ होत असल्यामुळे प्रशासनातर्फे चिंता व्यक्त केली जात आहे. कोरोना संसर्ग लागण होऊ नये यासाठी नागरिकांनी मास्क वापरावा. मास्क लावल्याशिवाय घराबाहेर पडू नये, सॅनेटायझरचा वापर करावा, गर्दीच्या ठिकाणी जाण्याचे टाळावे, सुरक्षित अंतर ठेवावे, लग्न समारंभ, अंत्यसंस्काराच्या ठिकाणी गर्दी करू नये, असे आवाहन आरोग्य वैद्यकीय अधिकारी डॉ. पारस मंडलेचा यांनी केले आहे.