Mumbai Accident : भरधाव ट्रकने टेम्पोला दिली धडक ; चालकाचा जागीच मृत्यू !

Mumbai Accident : गांधारपाले गावाजवळ भरधाव ट्रकने टेम्पोला धडक दिल्याने टेम्पोचालकाचा मृत्यू झाला आहे. बुधवारी पहाटे दोनच्या सुमारास मुंबई-गोवा महामार्गावर हा अपघात घडला.

टेम्पोचालक वैभव राजाराम बेनकर (३२, रा. रत्‍नागिरी) हा गोवाहून मुंबईकडे जात होता. महाड तालुक्‍यातील गांधारपाले येथे मुंबईकडून गोव्याच्या दिशेने येणाऱ्या भरधाव ट्रकने टेम्पोला समोरून जोरदार धडक दिली. अपघातात टेम्पोचालक वैभव यांचा मृत्यू झाला आहे तर त्याचा सहकारी मनीष श्यामसुंदर मस्के (३२, रा. संगमेश्‍वर) जखमी झाला आहे.

अपघातानंतर ट्रकचालक फरार झाला असून टेम्पोचालकाला महामार्ग पोलिस व ग्रामस्थांच्या मदतीने टेम्पोतून बाहेर काढून महाडमधील ग्रामीण रुग्णालय दाखल केले असता, मृत घोषित करण्यात आले. याप्रकरणी ट्रकचालकाविरोधात गुन्हा दाखल करण्यात आला असून अपघाताचा तपास महाड शहर पोलिस ठाण्यामार्फत सुरू आहे.

अवजड वाहनांचे रात्री मार्गक्रमण

गणेशोत्सवाच्या पार्श्वभूमीवर अवजड वाहनांना बंदी केल्यानंतर रात्री उशिरा ही वाहने मार्गक्रमण होतात. मुंबई-गोवा महामार्गाचे काम अजूनही अपूर्ण आहे, दिशादर्शक फलक आणि धोकादायक वळणे रात्री नीट दिसत नसल्यामुळे दिवसेंदिवस अपघातांची संख्या वाढत आहे.