आदिवासी मुलांच्या राहण्याचा मार्ग सुकर; पालीत वसतीगृह उभारणार

पाली : सुधागड तालुका हा आदिवासी बहुल (Tribals in sudhagad) तालुका आहे. त्यामुळे तालुक्यातील आदिवासी विद्यार्थ्यांना (Tribal student) तालुक्याच्या ठिकाणी शिक्षण घेता यावे व त्यांची गैरसोय थांबावी यासाठी पालीत सुसज्ज आदिवासी वसतिगृह (Hostel) उभारण्यात येणार आहे. त्यासाठी तब्बल साडेबारा कोटींची (fund permission) प्रशासकीय मान्यता नुकतीच मिळाली आहे.

राष्ट्रवादी काँग्रेस पक्षाच्या महिला जिल्हा अध्यक्षा गीता पालरेचा यांनी सुधागड तालुका आदिवासी संघटनेला सरकारने दिलेल्या मान्यतेची प्रत दिली. यावेळी राष्ट्रवादी काँग्रेस पक्ष जिल्हा उपाध्यक्ष हरिश्चंद्र पाटील, शिळोशी सरपंच सादूराम साजेकर, सुधागड आदिवासी संघटना अध्यक्ष चंद्रकांत वाघमारे, उपाध्यक्ष विश्वास भोय, दशरथ वालेकर, कृष्णा वाघमारे, लक्षण पवार, रमेश पवार, संतोष वाघमारे, बबन वाघमारे, दगडू वाघमारे व रामा हीलम आदी उपस्थित होते.

पालकमंत्री आदिती तटकरे यांनी सहायक प्रकल्प अधिकारी, एकात्मिक आदिवासी विकास प्रकल्प यांनी सरकारकडे सादर केलेल्या या वसतिगृह इमारतीच्या प्रस्तावाचा सातत्याने व्यक्तिशः पाठपुरावा केला होता. त्या अनुषंगाने शासनाने पाली येथे आदिवासी मुलांचे वसतिगृह उभारण्यासाठी १२ कोटी ५० लक्ष रकमेच्या अंदाजपत्रकास प्रशासकीय मान्यता प्रदान केली आहे.