'आझादी का अमृत महोत्सव'; भारतातील सर्वात मोठे सागरी जलतरण अभियान

वडाळा : ‘आझादी का अमृत महोत्सव’ या उपक्रमांतर्गत भारतातील सर्वांत मोठे आणि पहिले सागरी साहसी जलतरण अभियान (Sagari Jaltaran Abhiyan) राबवण्यात येत आहे. बुधवारी (ता. ६) मुंबईतील गेट वे ऑफ इंडिया ते घारापुरी लेणी (Elephanta caves) व तेथून परत अशा साधारण ३१ किलोमीटर अंतराच्या या अभियानाकरिता राज्यातील उत्कृष्ट ५० जलतरणपटू (swimmer) निवडले होते. यात १० ते ६० वर्षांपर्यंतच्या जलतरणपटूंचा समावेश होता.

क्रीडाक्षेत्रात जनजागृतीची गरज असल्याचे लक्षात घेऊनच सागरी साहसी जलतरण अभियान राबविण्याचा मानस महाराष्ट्र बॉक्सिंग असोसिएशनचे अध्यक्ष जय कोळी यांनी महाराष्ट्र शासनाचे क्रीडा विभाग मुख्य संयोजक जयप्रकाश दुबळे यांना सांगितला. त्याप्रमाणे नागपूर जिल्हा हौशी जलतरण संघटना, नॅशनल इन्स्टिट्यूट ऑफ स्वीमिंग, सागरी साहसी जलतरण प्रशिक्षण केंद्र, जुहू बीच, जेडी स्पोर्ट्स फाऊंडेशन, इंडियन ड्रायव्हर अँड एक्सप्लोरर्स असोसिएशन यांच्याशी संपर्क साधून कार्यक्रमाचे आयोजन करण्यात आले. अस्वच्छतेपासून, जल प्रदूषणापासून, जलतरण क्षेत्रातील स्पर्धकांना बुडण्यापासून आझादीचा संदेश देण्यासाठी हे अभियान राबवण्यात आले.