गोवंडीत सहा महिन्यांच्या बाळाची हत्या

गोवंडीत सहा महिन्यांच्या बाळाची हत्या
एचआयव्हीबाधित महिलेस अटक; आर्थिक विवंचनेतून कृती
मुंबई, ता. १ ः गोवंडीतील बैगनवाडी झोपडपट्टीत एचआयव्हीबाधित महिलेने आपल्या सहा महिन्यांच्या बाळाची गळा आवळून हत्या केल्याची घटना उघडकीस आली आहे. शिवाजीनगर पोलिसांनी हत्येचा गुन्हा नोंदवून या महिलेस अटक केली. सुलताना खान (वय ४३) असे या महिलेचे नाव आहे.

सुलताना ही चेंबूरच्या पी. एल. लोखंडे मार्ग येथील गारमेंटमध्ये मजुरी करते. अलीकडेच तिला आपण एचआयव्हीबाधित असल्याचे समजले होते. आपल्यामुळे बाळही (हैदर) बाधित असावे, असा संशय तिला होता. त्यामुळे आर्थिक विवंचनेतून ३१ जुलैला तिने बाळाची हत्या केली. प्रत्यक्षात मृत बाळाला एचआयव्हीची लागण झालेली नव्हती. मृत्यूपश्चात केलेल्या चाचणीतून बाळ एचआयव्ही निगेटिव्ह असल्याचे स्पष्ट झाले, असे पोलिस ठाण्यातून सांगण्यात आले.

सुलतानाचे तीन विवाह झाले होते. सध्या एकटीच राहते. काही महिन्यांपूर्वी तिचे अन्य एका व्यक्तीसोबत प्रेमसंबंध जुळले. त्यातून ती गरोदर राहिली आणि सहा महिन्यांपूर्वी तिने बाळाला जन्म दिला; मात्र तिचा प्रियकरही तिला सोडून गेला. त्यामुळे बाळाला एकटे सोडून तिला नोकरी करणे शक्य नव्हते. काही दिवसांपासून बाळाची व्‍यवस्था करून ती एका गारमेंटमध्ये कामाला जात होती. तिला एचआयव्हीची लागण झाल्याचे समजल्यानंतर ती तणावग्रस्त झाली. बाळालाही लागण झाल्याच्या शक्यतेने तिने बाळाच्या तोंडावर उशी दाबली. नंतर गळा आवळून त्याची हत्या केली.
-----------------------
असा उघड झाला प्रकार
बाळाची हत्या केल्यानंतर स्वतःही आत्महत्या करण्याच्या विचारात सुलताना गारमेंटमध्ये पोहोचली. तिथे तिने एका महिलेवर हल्ला केला. गारमेंट मालकाने पोलिसांना माहिती दिली. टिळकनगर पोलिस तेथे पोहोचले. त्यांच्या चौकशीत सुलतानाने दुपारी बाळाची हत्या केल्याचे सांगितले. टिळकनगर पोलिसांनी शिवाजीनगर पोलिसांना ही माहिती दिली. शिवाजीनगर पोलिस तिच्या घरी पोहोचले असता बाळ पाळण्यात बेशुद्धावस्थेत आढळले. त्याला राजावाडी रुग्णालयात नेले असता तेथील डॉक्टरांनी त्याला मृत घोषित केले.