इंदापूर–वाढवण रस्त्याची चाळण;

इंदापूर-वाढवण रस्त्याची चाळण;
धोकादायक प्रवासामुळे अपघाताची शक्‍यता
माणगाव, ता. २४ (बातमीदार) : रायगड जिल्ह्यातील माणगाव तालुक्यातील इंदापूर ते वाढवण या सुमारे दीड किलोमीटर अंतरावरील रस्त्याची अवस्था अत्यंत दयनीय झाली आहे. रस्त्यावर ठिकठिकाणी खोल खड्डे पडले असून, रस्त्याचे मूळ स्वरूपच नाहीसे झाले आहे. पावसामुळे या खड्ड्यांत पाणी साचून प्रवास अधिक धोकादायक बनला आहे.
या मार्गाचा वापर स्थानिक रहिवासी, शालेय विद्यार्थी, महिला, ज्येष्ठ नागरिक तसेच प्रवासी दररोज करतात. इंदापूर मार्ग एकीकडे मुंबई-गोवा महामार्गाशी जोडला जातो, तर दुसरीकडे तो माणगाव–पुणे मार्गाशी मिळतो. परिणामी, वाहतुकीची वर्दळ कायम असून, रस्त्याची ही दयनीय अवस्था नागरिकांच्या दैनंदिन जीवनावर गंभीर परिणाम करत आहे. या मार्गावरील प्रवास म्हणजे तारेवरची कसरत झाली आहे. शाळेच्या वाहनांमधून मुलांचा धोकादायक प्रवास, आपत्कालीन रुग्णवाहिका सेवेला होणारा अडथळा आणि दुचाकीस्वारांचा होणारा अपघात ही रस्त्याच्या दुरवस्थेची साक्ष देत आहेत.
...............
काम रेंगाळले, ठेकेदाराची दुर्लक्ष वृत्ती
पाणसई ग्रामपंचायतीचे माजी सरपंच विलास शिंदे यांनी या गंभीर समस्येकडे प्रशासनाचे लक्ष वेधले आहे. संबंधित विभाग व लोकप्रतिनिधींना त्यांनी वेळोवेळी निवेदने देऊन या रस्त्याचे तातडीने डांबरीकरण करण्याची मागणी केली आहे. त्यांचा आरोप आहे की, ठेकेदाराच्या हलगर्जीमुळे काम रेंगाळले असून, नागरिकांना नाहक त्रास सहन करावा लागत आहे. ग्रामीण भागातील शिक्षण, आरोग्य, व्यवसाय आणि रोजगार या साऱ्या गोष्टींवर चांगल्या रस्त्यांचा थेट परिणाम होतो. इंदापूरमध्ये विद्यालय, महाविद्यालय आणि प्राथमिक आरोग्य केंद्र असल्याने या मार्गावर नेहमीच वर्दळ असते, मात्र मुख्य रस्ता अक्षरशः धोकादायक बनला आहे.
...............
व्यवस्थेची संवेदनशीलता
हा विषय केवळ रस्त्यावरील खड्ड्यांपुरता मर्यादित नसून, नियोजन, उत्तरदायित्व आणि प्रशासनाच्या संवेदनशीलतेची कसोटी घेणारा आहे. इंदापूर बाजारपेठ संपूर्ण परिसराच्या सामाजिक व आर्थिक जीवनाचा केंद्रबिंदू आहे. शेतकरी, दुकानदार, महिला व विद्यार्थी यांचा रोजचा संपर्क याच मार्गाशी असतो. त्यामुळे या रस्त्याचे तातडीने डांबरीकरण होणे ही काळाची गरज बनली आहे. स्थानिक नागरिकांनी सोशल मीडिया आणि विविध माध्यमांतून आवाज उठवण्यास सुरुवात केली आहे. लवकरच ठोस निर्णय घेतला जाईल, अशी आशा व्यक्त होत आहे.