धारावीत निर्माण केला जात आहे कबुतरखाना

धारावीत निर्माण केला जात आहे कबुतरखाना
धारावी, ता. २९ (बातमीदार) : दादरमधील कबुतरखान्यावरून गेल्‍या काही दिवसांपासून वातावरण चांगलेच तापले होते. न्यायालयानेही कबुतरखाने बंद करावेत, असे आदेश पालिकेला दिले आहेत. त्यामुळे मोठा संघर्ष दादर येथे घडला होता.
धारावीतील संत रोहिदास मार्गावरील काळा परिसरातील रस्त्याच्या दुभाजकामध्ये कबुतरांना पाणी ठेवलेले आहे, तर खाद्य टाकले जात आहे. त्‍यामुळे या ठिकाणी मोठ्या प्रमाणावर कबुतरे जमा होत आहेत. यामुळे धारावीत नव्याने कबुतरखाना निर्माण होण्याची शक्यता आहे.
संत रोहिदास मार्ग हा वर्दळीचा रस्ता आहे. रस्त्यावरून जाणाऱ्या वाहनचालकांना या कबुतरांचा त्रास होत आहे. तर दुचाकीस्वारांना ही कबुतरे धडकत असल्याने अपघाताची भीती वर्तवण्यात येत आहे. येथे कबुतरांना खाद्य टाकणे बंद करावे, अशी मागणी वाहनचालक करीत आहेत.