रत्नागिरी-नागपूर राष्ट्रीय महामार्गावर पिस्तुलाच्या धाकाने अपहरण

शिरढोण : नरसिंहगाव तालुका कवठेमहांकाळ येथे रत्नागिरी-नागपूर राष्ट्रीय महामार्गावर दोन मोटर सायकल वरून आलेल्या चार अज्ञात चोरट्यांनी सांगली येथील दोघांना पिस्तूल व चाकूचा धाक दाखवत अपहरण केले. त्यानंतर निर्जनस्थळी नेऊन तीन लाख रुपये जबरदस्तीने काढून घेतले. हा प्रकार मंगळवारी (ता.10) रोजी सायंकाळी घडला. याची नोंद कवठेमहांकाळ पोलिसात झाली आहे.

याबाबत अधिक माहिती अशी की,

गणेश साबू मादीकर (वय 36 राहणार शंभर फुटी रोड डी-मार्ट जवळ) हे एका कंपनीत वसुलीचे काम करतात. चालक राजाराम शिंदेला घेऊन ते मंगळवारी जत, कवठेमहांकाळ तालुक्यात आले होते. सायंकाळी वसुलीची रक्कम घेऊन चार चाकी गाडी (एमएच 10 डीएल 9648) घेऊन ते निघाले होते.

सायंकाळी कवठेमहांकाळ येथील नरसिंह गावाजवळ आले तेव्हा दोन मोटरसायकलवरून आलेल्या अज्ञात चार चोरट्यांनी त्यांना अडवले. चालक राजाराम शिंदे यांना लाथाबुक्क्यांनी मारहाण केली. गणेश मादीकर व शिंदे या दोघांना चाकूचा धाक दाखवत नरसिंहगाव पासून नागज, आरेवाडी, नांगोळे,सलगरे रस्त्यावरून नेले. त्यानंतर बेडग ते कवठेमहांकाळ या निर्जन चोरट्यांनी तीन लाख एक हजार 200 रुपये काढून घेतले. त्यानंतरअंधारात दोघांना सोडून दिले. मादीकर यांनी याप्रकरणी कवठेमहांकाळ पोलिसांत फिर्याद दिली आहे. त्यानुसार अज्ञात चोरट्याविरुद्ध गुन्हा दाखल झाला आहे. पोलिस चोरट्यांचा शोध घेत आहेत.