इचलकरंजीचे शिष्टमंडळ आज जिल्हाधिकाऱ्यांना भेटणार

इचलकरंजीचे शिष्टमंडळ आज
जिल्हाधिकाऱ्यांना भेटणार

सुळकूड पाणी योजनाः गैरसमजाबाबत बाजू मांडणार

इचलकरंजी, ता.३१ ः सुळकूड उद्‍भव असलेली दुधगंगा योजना मार्गी लावण्याबाबत इचलकरंजीतील एक व्यापक शिष्टमंडळ उद्या (ता. १) दुपारी साडेबारा वाजता जिल्हाधिकारी राहुल रेखावार यांची भेट घेणार आहे. दुधगंगा (सुळकूड) योजना अंमलबजावणी कृती समितीच्या नेतृत्वाखाली हे सर्वपक्षीय शिष्टमंडळ भेट घेवून योजनेबाबत निर्माण झालेला गैरसमज दूर करण्यासाठी बाजू मांडणार आहे. कृती समितीचे निमंत्रीत विठ्ठल चोपडे यांनी ही माहिती दिली.
इचलकरंजी शहरासाठी अमृत दोन योजनेतून दुधगंगा योजनेला मंजुरी मिळाली आहे. त्याची निविदा प्रक्रिया सुरु आहे. ही योजना दृष्टीपथात येत असतानाच कागलमधील सर्वपक्षीय नेतेमंडळींनी विरोध केला आहे. दूधगंगा काठावरील काही गावांनी यापूर्वीच विरोध नोंदवला आहे. आता नेतेमंडळींचाही विरोध झाल्याने या योजनेचे पुढे काय, असा प्रश्नचिन्ह निर्माण झाला आहे. या पार्श्वभूमीवर शहरातील राजकीय नेतेमंडळींनी पाणीप्रश्नी हालचाली सुरु केल्या आहेत. दुधगंगा योजनेबाबतचा अहवाल जिल्हाधिकारी रेखावार हे शासनाला पाठवणार आहेत. त्यामुळे इचलकरंजीकरांची भूमिकाही महत्वाची आहे. शिष्टमंडळात खासदार धैर्यशील माने, माजी खासदार राजू शेट्टी, आमदार प्रकाश आवाडे, माजी आमदार सुरेश हाळवणकर आदींसह सर्वपक्षीय पदाधिकारी, सामाजिक कार्यकर्ते यांचा समावेश असणार आहे.