शहरात कानबाई मातेचा आजपासून जागर

पिंपरी, ता. १ ः ‘खान्देश सार्वजनिक श्री कानबाई माता उत्सव २०२५’ला उद्यापासून (ता. २) प्रारंभ होत आहे. खान्देशातील समृद्ध परंपरा जिवंत ठेवण्यासाठी आयोजित केल्या जाणाऱ्या या उत्सवाचे यंदा दुसरे वर्ष आहे. या सांस्कृतिक सोहळ्याला रविवारी (ता. ३) मुख्यमंत्री देवेंद्र फडणवीस उपस्थित राहणार असून, त्यांच्या हस्ते राज्यसभा खासदार उज्जल निकम यांना खान्देश भूषण पुरस्काराने सन्मानित करण्यात येणार आहे.
शनिवारी (ता. २) सायंकाळी बिजलीनगर येथील श्री तुळजाभवानी मंदिरात सप्त पूजन आणि गहू दळण्याचा कार्यक्रम होईल. तर रविवारी (ता.३) दुपारी एक ते सायंकाळी सहापर्यंत श्री कानबाई मातेची मिरवणूक काढण्यात येणार आहे. ही मिरवणूक श्री तुळजाभवानी मंदिर येथून सुरू होऊन आहेर गार्डन, वाल्हेकरवाडी येथे सांगता होईल. धुळे आणि नंदुरबार येथील आदिवासी समाज बांधवांचे आकर्षक आदिवासी नृत्य सादरीकरण मिरवणुकीचे मुख्य आकर्षण ठरेल.
खान्देशातील संस्कृती आणि परंपरेचा हा अविस्मरणीय जागर अनुभवण्यासाठी आणि पुढील पिढीला आपला समृद्ध वारसा जपण्याची प्रेरणा देण्यासाठी खान्देशी बांधवांनी सहकुटुंब, सहपरिवार उपस्थित राहून या सांस्कृतिक सोहळ्याची शोभा वाढविण्याचे आवाहन उत्सवाचे आयोजक सर्व खान्देशी समाज बांधव आणि प्रमुख संयोजक नामदेव ढाके यांनी केले आहे.