पावसाचा जोर वाढल्याने पवनमावळातील नद्यांना पूरस्थिती

सोमाटणे, ता. २६ : गेल्या चार दिवसांपासून मावळ तालुक्यात संततधार पावसाचा जोर कायम आहे. त्यामुळे पवनमावळातील आढले, मळवंडी आणि पुसाणे धरण १०० टक्के भरली आहेत. परिणामी, या धरणांच्या सांडव्यातून मोठ्या प्रमाणावर नदीपात्रात पाणी सोडले जात असून कासारसाई, पवना आणि आढले नद्यांना पूरस्थिती निर्माण झाली आहे.
कासारसाई धरणातून सध्या १,४०० क्युसेक्स, पवना धरणातून २,५०० क्युसेक्स, तर वीज प्रकल्पातून १,०५० क्युसेक्स वेगाने विसर्ग सुरू आहे. धरणातील अतिरिक्त पाणी नदीपात्रात वाहत असल्याने पवनमावळातील पवना कासारसाई, आढले या तीनही नद्यांना पूर आला आहे.
कासारसाई नदी सांगवडे पुलाजवळ, आढले नदी दारुंब्रे पुलाजवळ, पवना नदी गहुंजे साकवाजवळ धोक्याच्या पातळीवरून वाहत आहे. पावसाचा जोर आणखी वाढल्यास विसर्ग वाढवण्याची शक्यता असल्याने नागरिकांनी खबरदारी घ्यावी, पाटबंधारे विभागाने दिलेल्या सूचनांचे पालन करावे, नदीपात्रात उतरू नये, जनावरे नदीजवळ नेऊ नये, असे आवाहन पुणे पाटबंधारे विभागाचे कार्यकारी अभियंता डी. एम. डुबल यांनी केले आहे.

धरणांतील पाणीसाठा
- आढले, पुसाणे, मळवंडी - १०० टक्के
- कासारसाई- ९१.५८ टक्के
- पवना ८४ टक्के

PNE25V34529
---