‘पॅट’ परीक्षा सुरू, प्रश्नपत्रिकांचा तुटवडा

पिंपरी, ता. १० : महाराष्ट्र राज्य शैक्षणिक संशोधन व प्रशिक्षण परिषदेतर्फे (एमएससीईआरटी) घेतल्या जाणाऱ्या नियतकालिक मूल्यांकन चाचणी-२ (पॅट-प्रोग्रेसिव्ह ॲसेसमेंट टेस्ट) परीक्षेला वेळापत्रकानुसार सुरुवात झाली आहे. शहरातील महापालिका आणि अनुदानित शाळांतील विद्यार्थ्यांसाठी १ लाख २८ हजार ६१ प्रश्‍नपत्रिका पुरवण्यात आल्या आहेत. यामध्ये मराठी माध्यमाच्या ६५ हजार ७६५ विद्यार्थ्यांनी परीक्षा दिली.
शिक्षण विभागाने ८ ते २५ एप्रिलदरम्यान विद्यार्थ्यांच्या वार्षिक परीक्षा आणि ‘पॅट’ एकाच वेळी घेण्याचे आदेश दिले आहेत. गेल्या वर्षांप्रमाणेच यंदाही प्रश्‍नपत्रिका कमी पडल्याची ओरड काही मुख्याध्यापक-शिक्षकांनी केली. स्थानिक परिस्थितीनुसार शिक्षणाधिकारी परीक्षांच्या वेळापत्रकात बदल करू शकतात, असे आदेश मुंबई उच्च न्यायालयाच्या नागपूर खंडपीठाने दिले आहेत. त्यानुसार, शिक्षण विभागाने तातडीने सध्याच्या वेळापत्रकात बदल केले आहेत. प्राथमिक वर्गांच्या परीक्षा सकाळच्या सत्रांत उरकण्याची तयारी काही शाळांनी केली आहे.

ाया विषयांची चाचणी
बुधवारी पाचवीची मराठी भाषा, तर आठवी आणि नववीची तृतीय भाषा म्हणजे इंग्रजीची परीक्षा झाली. ११ एप्रिलला पाचवीची इंग्रजीची, आठवी आणि नववीची गणिताची चाचणी होईल. १९ एप्रिलला सहावी आणि सातवीच्या संकलित चाचणीला सुरुवात होईल.

‘विनाअनुदानित’ला नाही प्रश्‍नपत्रिका
काही शाळांना पाच, तर काही शाळांमध्ये २५ ते ३० प्रश्‍नपत्रिकांचा तुटवडा आहे. या प्रश्‍नपत्रिकांच्या कोणत्याही झेरॉक्स, प्रिंट काढू नयेत. याची पीडीएफ कुठे शेअर करू नये, अशा सूचना परिषदेने शाळांना दिल्या आहेत. त्यामुळे सर्व विद्यार्थ्यांना प्रश्‍नपत्रिका पुरविणार कशा, असा प्रश्‍न शिक्षकांना पडला आहे. झेरॉक्स काढून प्रश्‍नपत्रिकांची पूर्तता करावी लागत असल्याची ओरड काही शाळांकडून झाली. तर ‘‘अनुदानित शाळांना प्रश्‍नपत्रिका मिळते, पण विनाअनुदानित शाळांना नाही,’’ असे शिक्षण विभागाने स्पष्ट केले आहे.

आकडेवारी

आकुर्डी शहर साधन केंद्र
माध्यम -माध्यम निहाय वाटप
मराठी -६५, ७६५
इंग्रजी -२२०४
हिंदी -४६१६
उर्दू -२५२०
एकूण -७५, १०५

पिंपरी शहर साधन केंद्र
माध्यम -माध्यम निहाय वाटप
मराठी -४०, ६२७
इंग्रजी -७३२४
हिंदी -२१८५
उर्दू -२८२०
एकूण -५२, ९५६