Pune Rain : पुणे जिल्ह्यात सरासरीच्या तुलनेत २७ टक्के कमी पाऊस

पुणे - जिल्ह्यात उशीरा दाखल झालेल्या मॉन्सूनने पहिल्या दिवसापासूनच बरसण्यास सुरवात केली. जूनच्या शेवटच्या आठवड्यात घाटमाथ्यासह अनेक ठिकाणी जोरदार पावसाने हजेरी लावली होती. मात्र, अजूनही जिल्ह्यात सरासरीच्या तुलनेत २७ टक्के कमी पाऊस पडला असून, ७५ मिलिमीटर पावसाची तूट कायम आहे.

अरबी समुद्रात गुजरात ते केरळ किनारपट्टी लगत तयार झालेला कमी दाबाचा पट्टा. तसेच दक्षिणेत असलेला मॉन्सूनचा आस यामुळे देशभरात जोरदार पावसाने हजेरी लावली आहे. मात्र, अजूनही पुणे जिल्ह्याला जोरदार पावसाची प्रतिक्षा आहे. मागील काही दिवसांपासून पावसाची रिमझीम कमी झाली असून, उघडीपही वाढली आहे.

आजपर्यंत जिल्ह्यात २८४ मिलिमीटर पावसाची नोंद होणे आवश्यक होते. मात्र, आजवर २०९ मिलिमीटर पाऊस पडला आहे. जिल्ह्यात पुढील दोन दिवस आकाश मुख्यतः ढगाळ, तर हलक्या स्वरूपाच्या पावसाची शक्यता वर्तविण्यात आली आहे. याच काळात घाटमाथ्यावर तुरळक ठिकाणी मुसळधार पावसाची शक्यता वर्तविण्यात आली आहे.