खात्यात जमा झालेली रक्कम प्रामाणिकपणे केली परत

आंधळगाव, ता. २४ : बँक खात्यावर चुकून जमा झालेले २० हजार रुपये प्रामाणिकपणे परत करून समाजात अजूनही प्रामाणिकपणा जिवंत असल्याचे नागरगाव येथील शांताबाई धोंडिबा शेलार या ज्येष्ठ महिलेने दाखवून दिले आहे.
वडगाव रासाई (ता. शिरूर) येथील महादेव शांताराम पिंगळे हे वनविभागात सफाईचे काम करतात. वनविभागाने गेल्या महिन्यातील कामाच्या मजुरीच्या रकमेचा तपशील त्यांच्या खात्यात जमा करायला बँकेत दिला होता. पिंगळे यांच्या खात्यावर ही रक्कम जमा करत असताना बँक कर्मचाऱ्याकडून खाते नंबर चुकल्याने हे पैसे पिंगळे यांच्या खात्यात जमा न होता शेलार यांच्या खात्यात जमा झाली. त्यानंतर बरेच दिवस बँकेत पैसे जमा न झाल्याने पिंगळे यांनी वनविभागाचे कर्मचारी शेखर गवळी यांना याबाबत माहिती दिली. गवळी यांनी बँकेत जाऊन या रकमेबाबत चौकशी केली असता शांताबाई शेलार यांच्या खात्यात पैसे जमा झाल्याचे त्यांच्या निदर्शनास आले. ही बाब गवळी यांनी घोडगंगा कारखान्याचे माजी संचालक अनिल शेलार यांना सांगितली. यावेळी शेलार यांनी शांताबाई यांचे चिरंजीव मनोहर शेलार यांना विचारणा केली असता आई वारीला गेली असून ती परत आली की बँक खात्यात रक्कम जमा झाली असेल ती परत करु असे सांगितले. शांताबाई यांनी वारीवरून गावी आल्यानंतर बँकेत जाऊन आपले खाते तपासले. यावेळी महादेव पिंगळे यांचे पैसे आपल्या बँक खात्यात जमा झाल्याचे त्यांच्या लक्षात आले. त्यांनी तत्काळ आपल्या बँक खात्यातील २० हजार ६५३ रुपये इतकी रक्कम काढून वनविभागाचे कर्मचारी शेखर गवळी यांच्याकडे सुपूर्द केली.