नारायणगावात तीन गावगुंडांवर गुन्हा दाखल

नारायणगाव, ता. २६: उधारीवर सिगारेट दिली नाही म्हणून मारहाण करून दहशत निर्माण करणाऱ्या व भांडण सोडवण्यासाठी आलेल्या तरुणाला मारहाण करून त्याची लूटमार करणाऱ्या तीन गावगुंडांवर नारायणगाव पोलिसांनी गुन्हा दाखल केला आहे. यापैकी दोन आरोपींना अटक केली असून, एकजण फरार आहे. अटक आरोपींना चार दिवसांची पोलिस कोठडी मिळाली आहे, अशी माहिती सहाय्यक पोलिस निरीक्षक महादेव शेलार दिली.

याप्रकरणी ओम सुखदेव बर्डे, कुणाल चंद्रकांत कानडे(राहणार नारायणगाव, ता. जुन्नर) यांना अटक केली असून त्यांचा सहकारी इतर एक आरोपी फरार झाला आहे. उधारीवर सिगारेट देत नाही म्हणून २० जुलै २०२५ रोजी आरोपी शेवंताई सीएनजी पंपाजवळ असलेल्या आकाश पान शॉप या टपरी चालकाला शिवीगाळ करत होते. यावेळी सुशांत शांताराम आमले याने भांडण कशाला करता असा जाब आरोपींना विचारला. या कारणावरून आरोपींनी सुशांत आमले याला लाथा बुक्क्यांनी मारहाण करून मोटरसायकल वरून खाली पाडले. शर्टाचे बटन तोडून आमले यांच्या गळ्यातील एक तोळे वजनाची सोन्याची चैन, शर्टाच्या वरच्या खिशात असलेले साडेसात हजार रुपये रोख रक्कम बळजबरीने हिसकावून घेऊन आरोपी पसार झाले.
याप्रकरणी आमले यांनी दिलेल्या तक्रारीवरून पोलिसांनी नारायणगाव पोलिसांनी आरोपींवर गुन्हा दाखल केला होता. सहाय्यक पोलिस निरीक्षक महादेव शेलार यांच्या मार्गदर्शनाखाली पोलिस उपनिरीक्षक जगदेवाप्पा पाटील, पोलिस हवालदार मंगेश लोखंडे, पोलिस शिपाई सत्यम केळकर, सोमनाथ डोके, दत्ता ढेंबरे, टीलेश जाधव यांनी आरोपींना अटक केली.

06932