राष्ट्रीय एकात्मतेसाठी युवकांचा केरळ ते काश्मीर सायकल प्रवास

कऱ्हाड (सातारा): राष्ट्रीय एकात्मतेसाठी केरळ ते लेह लद्दाख-जम्मू काश्मीर असा सायकलवरून प्रवास करणाऱ्या केरळचे दोन युवक आणि एक युवती येथे पोहचल्या. त्यांचा विजय दिवस समितीच्यावतीने विजय दिवस चौकात सत्कार करण्यात आला.

भारत देश एक आहे, हा नारा घेवून राष्ट्रीय एकात्मतेसाठी केरळचे माशोर शान, महंमद स्थामील आणि सहला पाराप्पन हे तीघेजण केरळपासून लेह लद्दाख-जम्मू काश्मीर असा सायकलवरुन १०० दिवस प्रवास करणार आहेत. ते आज कर्नाटकातून कोल्हापुरहून येथे पोहचले. त्यावेळी त्यांचा विजय दिवस समितीच्यावतीने नगरसेवक विजय वाटेगावकर, माजी नगरसेवक दिपक बेलवणकर, विजय दिवस समीतीचे सहसचिव विलासराव जाधव, प्रा. भगवान खोत, चंदु जाधव, रविराज जाधव, बाळासाहेब मोहिते, सुनिल बनसोडे, नितीन गोतपागर यांच्यासह मान्यवरांनी त्यांचा सत्कार केला. त्यानंतर त्यांनी येथील यशवंतराव चव्हाण स्मृतीसदनास, विजय दिवस समितीच्या कार्यालायास भेट दिली. त्यावेळी विलासराव जाधव, प्रा. खोत यांनी विजय दिवस आणि कऱ्हाडची माहिती दिली. त्यानंतर ते पुढील प्रवासासाठी रवाना झाले.