मीटर वाचन सुरू; लवकरच मिळणार वीजबिल

नागपूर : नागपूर शहर, ग्रामीणसह वर्धा जिल्ह्यात वीजमीटरचे वाचन आणि बिलवाटपाला शासनाकडून परवानगी मिळाली आहे. त्यानुसार मीटर वाचन आणि बिलाची प्रिंटिंगही सुरू झाली आहे. लवकरच ग्राहकांच्या घरी अचूक वीजबिल पोहोचणार असल्याची माहिती महावितरणच्या नागपूर परिमंडळाचे मुख्य अभियंता दिलीप दोडके यांनी दिली. 

कोरोनाच्या पार्भूमीवर मार्च महिन्यापासून मीटर वाचन तसेच बिलाचे प्रिंटिंग आणि वितरण थांबविण्यात आले होते. महावितरणच्या मोबाईल ऍपवर स्वत: रीडिंग पाठविणाऱ्या ग्राहकांना वास्तविक तर उर्वरितांना सरासरी वीजबिल एसएमएसव्दारे पाठविण्यात येत होते. राज्य सरकारकडून वेळोवेळी प्राप्त झालेल्या परिपत्रकानुसार महावितरण मुख्य प्रशासनाने जारी केलेल्या निर्देशाच्या अधीन राहून सोशल डिस्टन्सिंग नियमाचे काटेकोर पालन करत, वीज ग्राहकांना आपल्या वीजवापराचे अचूक वीजबिल देण्यासाठी मीटर वाचन, बिल प्रिटिंग आणि वीजबिलाचे वितरण करण्यात येणार आहे. 

हेही वाचा : वरुडच्या दोन युवकांचा शेकदरी धरणात बुडून मृत्यू 

मीटर वाचन आणि वीजदेयकाचे वाटप करण्याऱ्या कर्मचाऱ्यांनी हॅंडग्लोज, चेहऱ्यावर मास्क बांधणे, सोबत सॅनिटायझर ठेवणे बंधनकारक करण्यात आले आहे. महापालिकेने कंटेन्मेंट झोन वगळता इतरत्र काम करण्याची परवानगी महावितरणला दिली आहे. त्यानुसार, कंटेनमेंट झोन असणाऱ्या भागात सध्या मीटरवाचन अथवा वीज देयकाचे वितरण होणार नाही.