Hingna Crime: थट्टामस्करीही केली अन् वस्तराही चालविला! निवडणुकीनंतर विरोधी गटाच्‍या कार्यकर्त्यावर वार

Hingna Crime : तालुक्यातील शेवटच्या टोकावर असलेल्या देवळी- पेंढरी गावात आज मंगळवारी उपसरपंचपदाची निवडणूक झाली. निवडणुकीनंतर विरोधी पक्षाच्या कार्यकर्त्यावर ६५ वर्षीय नाव्ह्याने वस्तऱ्याने हल्ला करून गंभीर जखमी केले. ही घटना सायंकाळी ५.३० वाजता घडली. गंभीर जखमीला तातडीने ग्रामीण रुग्णालयात दाखल करण्यात आले.

ग्रामपंचायती जवळच आरोपी नत्थू गणपत साखरकरचे घर व सलूनचे दुकान आहे. उपसरपंचपदाची निवडणूक पार पडल्यानंतर भास्कर रुशाल जाधव (५२) रा. काजळी(पेंढरी) हे साखरकर यांच्या घरासमोरून जात होते.

काही लोकांसमोर आरोपीने भास्कर यांची थट्टा केल्याने वाद झाला. भांडण विकोपाला गेले. संतापलेल्या आरोपीने त्याच्याजवळ असलेला वस्तरा बाहेर काढून भास्करवर वार केला. कानाजवळ वस्तरा लागल्याने भास्कर जखमी झाले. गावातील काही नागरिकांनी त्याला उपचारासाठी नेले.

हिंगणा पोलिसांना घटनेची माहिती देण्यात आली. जखमीने दिलेल्या माहितीवरून पोलिसांनी घटनेची नोंद केली आहे. प्रकरणी रात्री उशिरापर्यंत गुन्हा दाखल करण्याची प्रक्रिया पोलीस ठाण्यात सुरू होती. घटनेचा पुढील तपास ठाणेदार विशाल काळे यांच्या मार्गदर्शनाखाली सुरू आहे. (Latest Marathi News)