Accident : भरधाव ट्रकची दुचाकीला धडक; चालकाचा मृत्यू, एक जखमी

भंडारा - येथे राष्ट्रीय महामार्गावर तहसील कार्यालयासमोर मंगळवारी रात्री भरधाव वेगात आलेल्या ट्रकने दुचाकीला धडक दिली. यात दुचाकीवरील व्यक्तीचा मृत्यू झाला तर अन्य एक जखमी झाला आहे. मृताचे नाव सोपान नामदेव टांगले (वय. ५८, या.सालेबर्डी) असे आहे.

तालुक्यातील सालेबर्डी येथील सोपान टांगले हा रात्री १० वाजताच्या सुमारास दुचाकीने विशाल टांगले यांच्या सोबत गावाकडे जाण्यास निघाला. राष्ट्रीय महामार्गावर तहसील कार्यालयासमोर भरधाव वेगाने आलेला ट्रक (सीजी ०४/एचवाय ७२९६)चालकाने सोपान यांच्या दुचाकीला डाव्या बाजूला कट मारला. यामुळे दुचाकीसह महामार्गावर पडलेला सोपान गंभीर जखमी होऊन त्याचा मृत्यू झाला.

तसेच सोबत असलेला विशाल टांगले हा किरकोळ जखमी झाला आहे. भंडारा पोलिसांनी ट्रक चालक हर्षदीप सिंग मलडे याच्याविरोधात गुन्हा दाखल केला आहे. ठाणेदार गोकुळ सूर्यवंशी यांच्या मार्गदर्शनाखाली सहायक पोलिस निरीक्षक पवार तपास करीत आहेत.