WhatsApp मुळे मांडवात गोंधळ; नवरदेवाला पाहताच नवरी गेली पळून

पाटणा - सध्या व्हॉटटसअॅपचा वापर मोठ्या प्रमाणावर केला जातो. एखादा फोटो, व्हिडिओ, डॉक्युमेंट पाठवण्यासाठी सोयीचं माध्यम म्हणून याकडे पाहिलं जातं. याच व्हॉटसअॅपवरून फोटो शेअरिंग करून लग्न ठरलेलं मात्र ऐनवेळी लग्न मांडवात वधुने लग्नाला नकार दिला. बिहारच्या बेतियामध्ये हा प्रकार घड़ला आहे. मांडवात नवरदेवाला पाहताच वधूने काढता पाय घेतला. व्हॉटसअॅपवर पाठवलेल्या फोटोवरून लग्न ठरवलं होतं. मात्र मंडपात जेव्हा वधुने नवरदेवाला पाहिलं तेव्हा लग्नाला नकार दिला. यामुळे वराती लग्नाशिवाय घरी परतले. 

बेतियामध्ये घडलेल्या या प्रकाराची चर्चा तिथे होत आहे. लग्नासाठी मंदिरात आलेल्या दोन्ही बाजुच्या मंडळींमध्ये वाद सुरु झाला. वधुची मोठी बहीण देवांती देवीने मुलीला मांडवातून नेल्याचा आरोप करण्यात आला. यावर वधु पक्षाने सांगितलं की, माझ्या मुलीला मुलगा पसंत नाही. यामुळे ती मांडवातून निघून गेली. 

हे वाचा - आम्ही का परत जावं? ‘टाईम’ च्या मुखपृष्ठावर महिला शेतकरी

वधुने व्हॉटसअॅपवर नवरदेवाचा फोटो पाहिला होता. त्यानंतर लग्न ठरले होते. मात्र प्रत्यक्षात जेव्हा नवरदेव समोर आला तेव्हा तिला मुलगा पंसत पडला नाही. लग्नाला आलेल्या एका पाहुण्यानं म्हटलं की, नातेवाइकांसह सगळे लग्न मांडवात होते. इथं नवरीच्या मोठ्या बहिणीनं तिला मांडवातून पळवून नेलं. 

देशभरातील बातम्या वाचण्यासाठी क्लिक करा

नवरी मंडपातून पळून गेल्यानंतर दोन्ही पक्षांमध्ये अनेक तास वाद झाला. अखेर स्थानिकांनी मध्यस्थी करून त्यांना शांत केलं. मुलाचं आणि मुलीचं गाव बैरिया पोलिस ठाण्याचा हद्दीत आहे. या प्रकरणाची चर्चा भागात होत असली तरी याबाबत अद्याप कोणी पोलिसात गेलेलं नाही. कोणत्याही प्रकारची तक्रार दोन्हीपैकी कोणाकडूनच झालेली नाही.