Devgad Crime : घरी सिलींग फॅन आहे? मग विशेष काळजी घ्या, अन्यथा मोठी दुर्घटना घडेल!

देवगड : सिलींग फॅनचा (Ceiling Fan) गड्डा तुटून अंगावर पडून जखमी झालेल्या वृद्धेचा उपचाराचादरम्यान मृत्यू झाला. येथील पवनचक्की सुमतीनगरमध्ये ही घटना घडली. अंजली अशोक चिंदरकर (वय ६३) असे त्यांचे नाव आहे.

ही घटना काल सकाळच्या सुमारास घडली. याबाबत येथील पोलिस (Devgad Police) ठाण्यात आकस्मिक मृत्यूची नोंद केल्याची माहिती पोलिस निरीक्षक नीळकंठ बगळे यांनी दिली. अंजली चिंदरकर यांची तब्येत बरी नसल्याने त्या घरात झोपल्या होत्या.

त्या झोपलेल्या ठिकाणी डोक्यावरील छपरावर असलेल्या पाईपचा स्क्रू गंजून सिलींग फॅनचा गड्डा तूटून त्यांच्या अंगावर पडला. त्यांच्या बरगड्यांवर फॅनचा गड्डा पडून त्यांना मुका मार लागला. त्यांना अस्वस्थ वाटू लागल्याने त्या तिथेच वेदनेने कण्हत होत्या.

हे निदर्शनास येताच तातडीने त्यांच्या पतीसह नातेवाईकांनी रिक्षातून त्यांना उपचारासाठी येथील ग्रामीण रुग्णालयात दाखल केले; मात्र त्यांचा मृत्यू झाला. त्यांच्या बरगड्यांना दुखापत झाली असावी, असा पोलिसांचा अंदाज आहे. अधिक तपास देवगड पोलिस करीत आहेत.