अमरावती प्रकरणात मोठा खुलासा; फक्त 10 हजारांच्या सुपारीवर झाली हत्या

Umesh Kolhe Murder Case : अमरावती केमिस्ट उमेश कोल्हे याच्या खून प्रकरणात मोठा खुलासा झाला आहे. पोलिसांनी दिलेल्या माहितीनुसार, आरोपींनी 10 हजार रुपये घेऊन केमिस्ट उमेश कोल्हे यांचा खून केल्याचा प्रकार समोर आला आहे.

पोलिस आयुक्त आरती सिंह यांनी पत्रकार परिषदेत ही माहिती दिली. त्याचबरोबर त्यांनी खासदार नवनीत राणा यांचे आरोप निराधार आणि खोटे असल्याचे देखील म्हटले आहे. तसेच केमिस्ट उमेश कोल्हे यांच्या हत्येप्रकरणी नुपूर शर्माचा अँगल समोर आला होता, मात्र हे प्रकरण अतिशय संवेदनशील असल्याने ते उघड झाले नसल्याचेही त्यांनी सांगितले.

त्या म्हणाल्या की, पोलिसांनी आतापर्यंत सात आरोपींना ताब्यात घेतले आहे. त्याचवेळी आठवा आरोपी शमीमही आमच्या रडारवर आहे. या प्रकरणातील आरोपींकडून दोन मोटारसायकली आणि तीन चायनीज चाकूही जप्त करण्यात आले आहेत. त्या म्हणाल्या की, आज किंवा उद्या आम्ही या घटनेचा तपास एनआयएकडे सोपवत आहोत. उमेश कोल्हे यांच्या हत्येसाठी इरफानने पाच आरोपींना १० हजार रुपये आणि मोटारसायकल दिल्याचेही त्यांनी यावेळी सांगितले.

त्या म्हणाल्या की, काही दिवसांपूर्वी मी आमदार रवी राणा यांच्यावर आयपीसी कलम 307 अंतर्गत गुन्हा दाखल केला होता, त्यामुळे खासदार नवनीत राणा माझ्यावर खोटे आरोप करत आहेत. त्यांनी खासदार नवनीत राणा यांचे आरोप निराधार असल्याचे म्हटले आहे.

तसेच त्यांनी सांगितले की, अशा पोस्ट व्हायरल झाल्यानंतर शहरातील तीन जणांना धमक्या आल्या आहेत, मात्र त्यापैकी एकानेच तक्रार दिली असून दोन जण पुढे यायला तयार नाहीत. खासदार नवनीत राणा यांनी अमरावती पोलीस आयुक्तांवर एक दिवसापूर्वी प्रकरण दडपल्याचा आरोप केला होता.

उमेश कोल्हे खून प्रकरणातील सातही आरोपींना अमरावती न्यायालयात हजर केल्यानंतर त्यांना ४ दिवसांची ट्रान्झिट रिमांड मंजूर करण्यात आली. अमरावती पोलिसांनी सर्व आरोपींना ८ जुलै रोजी किंवा त्यापूर्वी एनआयएच्या मुंबई न्यायालयात हजर करणार आहेत.