नागपूर: उपराजधानीत आजपासून सुरू झालेल्या राष्ट्रीय सायकलपोलो स्पर्धेत सहभागी होण्यासाठी आलेल्या केरळच्या १० वर्षीय मुलीचा मृत्यू झाला. ही धक्कादायक घटना गुरुवारी सकाळी उघडकीस आली. निदा फातिमा असे मृत खेळाडूचे नाव आहे.
पोलिस व स्पर्धेचे आयोजक गजानन बुरडे यांनी दिलेल्या माहितीनुसार, केरळचा मुलींचा संघ स्पर्धेत सहभागी होण्यासाठी बुधवारी सायंकाळी नागपुरात दाखल झाला होता. खेळाडूंच्या निवासाची व्यवस्था धंतोलीमधील भारतीय मजदूर संघाच्या कार्यालयात करण्यात आली होती. निदाच्या पोटात दुखत असल्यामुळे तिला सकाळी आठच्या सुमारास धंतोली येथील एका खासगी रुग्णालयात उपचारार्थ भरती करण्यात आले.
स्पर्धेसाठी आलेल्या १० वर्षीय मुलीचा मृत्यू
उपचारादरम्यान इंजेक्शन दिल्यानंतर तब्येत आणखी बिघडून साडेदहा वाजता तिचा मृत्यू झाला. निदाला दोन दिवसांपासून ‘मोशन’ होत नव्हती. त्यामुळे टॅब्लेट दिल्यानंतर तिच्या पोटात दुखू लागले होते. दरम्यान, निधाचे शव पोस्टमार्टेमसाठी पाठविण्यात आले आहे.
आई-वडील आल्यानंतर होणार पोस्टमार्टेम
निदाचे आई-वडील केरळवरून नागपूरकडे निघाले असून, ते आल्यानंतर शुक्रवारी पोस्टमार्टेम होणार आहे. शवचिकित्सा अहवालातून निदाच्या मृत्यूचे खरे कारण पुढे येणार आहे. या खळबळजनक घटनेमुळे केरळ संघाचे प्रशिक्षक व व्यवस्थापकासह तिच्या सहकारी खेळाडूही प्रचंड हादरल्या आहेत. धंतोली पोलिसांनी आकस्मिक मृत्यूची नोंद करून तपास सुरू केला आहे.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.