Maharashtra Assembly : नितेश राणे आणि अनिल परबांमध्ये सभागृहातच हमरीतुमरी

मुंबई : राज्याच्या विधीमंडळाच्या अधिवेशनाचा (Maharashtra Assembly Winter Session 2021) आज दुसरा दिवस आहे. आज देखील विरोधकांनी सकाळीच पायऱ्यांवर निर्दशने केली. परिवहन मंत्री अनिल परब (Shivsena Minister Anil Parab) आणि भाजपचे आमदार नितेश राणे (BJP MLA Nitesh Rane) यांच्यामध्ये सभागृहातच हमरीतुमरी झालेली पाहायला मिळाली. नितेश राणेंच्या विरोधात शिवसेना आधीच आक्रमक आहे. त्यातच आज अनिल परब अधिक आक्रमक झाल्याचे पाहायला मिळाले.

वाशी येथील परिवहन कार्यालयातील वाहनांचा कर वसूल करण्याबाबत भाजप आमदार मंगल प्रभात लोढा यांनी प्रश्न विचारला. त्यावर परिवहन मंत्री अनिल परब उत्तर देत होते. त्यात मध्येच नितेश राणे बोलले. त्यानंतर अनिल परबांचा आवाज चढला आणि त्यांनी नितेश राणेंना सुनावले. परब म्हणाले, मला मंगलप्रभात लोढा यांनी प्रश्न विचारला. मी त्यांना उत्तर आधी देतो. तुम्ही तुमच्या जागेवर जा. जिथे जागा आहे तिथे जाऊन बसा. त्यानंतर नितेश राणे देखील आक्रमक झालेले पाहायला मिळाले. अध्यक्षांनी हस्तक्षेप करत नितेश राणेंना जागेवर बसण्यास सांगितले. त्यानंतर विरोधी पक्षनेते देवेंद्र फडणवीस यांनी नितेश राणेंचा सीट क्रमांक सांगा, अशी विचारणा अध्यक्षांना केली. सीट नंबर तुम्ही नाहीतर आम्ही देतो, असं फडणवीस म्हणाले.

एसटी संपात 57 कर्मचाऱ्यांनी आत्महत्या केली. त्यांच्या वारसदारांना नोकरी देणार का? असा प्रश्न भाजप आमदार श्वेत महाल्ले यांनी विचारला होता. त्याला उत्तर देताना परिवहन मंत्री म्हणाले, ''एसटीच्या 57 कर्मचारी आत्महत्या केली. त्यांच्या वारसांना नोकरी देण्याबाबत सरकार सकारात्मक आहे. याबाबत माहिती घेत आहोत. आत्महत्या कशामुळे झाल्या? हे तपासणार जाणार असं अनिल परब म्हणाले.