Winter Session 2022 : ''लोकशाहीच्या गप्पा मारणारे सभागृहात ४६ मिनिटं होते'' फडणवीसांनी काढले वाभाडे

नागपूरः विधीमंडळाचं हिवाळी अधिवेशन आज संपलं. त्यानंतर राज्याचे मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी एकत्रित पत्रकार परिषद घेतली. यावेळी देवेंद्र फडणवीस यांनी सुरुवातीला अधिवेशनात मंजूर केलेल्या प्रस्तावांची माहिती दिली. त्यानंतर एकनाथ शिंदे यांनी विदर्भासाठी काय केलं ते सांगितलं.

यावेळी बोलतांना देवेंद्र फडणवीस म्हणाले की, एकट्या विदर्भासाठी ३५ हजार कोटी रुपयांच्या प्रकल्पांची घोषणा करण्यात आलेली आहे. त्यामुळे विदर्भाच्या विकासाचा अनुशेष भरुन निघेल. आम्ही लोकशाही मानणारी लोकं आहोत. त्यामुळे सभागृहात पूर्णवेळ थांबून कामं केली. परंतु जे लोकशाहीच्या नावाने आवई उठवतात ते केवळ ४६ मिनिटं सभागृहात होते.

हेही वाचाः जोखमीचे भान राखूनच करा SIP मध्ये गुंतवणूक

उद्धव ठाकरे यांचं नाव न घेता देवेंद्र फडणवीस यांनी बोचरी टीका केली. त्यांनंतर राज्याचे मुख्यमंत्री एकनाथ शिंदे यांनी मंजूर प्रकल्पांबाबत माहिती दिली.

एकनाथ शिंदे म्हणाले की, हे सरकार बदललं नसतं तर यावर्षीही अधिवेशन झालं नसतं. कारण तिकडे चीन, जपानमध्ये कोरोना आलेला आहे... असं म्हणत त्यांनी उद्धव ठाकरेंवर नाव न घेता टीका केली.

''विदर्भातले सिंचनाचे, रस्त्याचे, प्रकल्पांचे प्रश्न या अधिवेशनामध्ये सोडवले. त्यामुळे विदर्भात ४५ हजार लोकांना रोजगार आणि ७० हजार कोटींची गुंतवणूक होणार आहे. आम्ही राज्याचं खनिज धोरण राबविण्याचा निर्णय घेतलाय'' अशीही माहिती एकनाथ शिंदेंनी दिली.