ठाकुर्ली ९० फुटी रस्त्यावर अपघात

ठाकुर्ली ९० फुटी रस्त्यावर अपघात
१९ वर्षीय विद्यार्थ्याची महिला दुचाकीस्वाराला धडक

डोंबिवली, ता. १ : ठाकुर्ली येथील ९० फुटी रस्त्यावर शनिवारी (ता. २७) सायंकाळी एका १९ वर्षीय विद्यार्थ्याने भरधाव वेगात दुचाकीची धडक एका महिला दुचाकीस्वाराला दिल्याची घटना घडली. यात महिलेला गंभीर दुखापत झाली आहे. या अपघातात जयश्री बोढाळे या दुचाकीसह रस्त्यावर पडल्याने पायाचा पंजा मोडण्यासह शरीरावर अनेक ठिकाणी जखमा झाल्या आहेत.

रामनगर पोलिस ठाण्यात दिलेल्या तक्रारीनुसार, जयश्री बोढाळे या म्हसोबा चौकाजवळ स्वतःच्या दुचाकीने जात होत्या. त्या वेळी डोंबिवली पूर्वेच्या देसलेपाडा परिसरातील रहिवासी आणि विद्यार्थी दिव्येश परब (वय १९) याने भरधाव वेगाने त्यांच्या दुचाकीला मागून जोरदार धडक दिली. दिव्येशने दुचाकीवर नियंत्रण गमावल्यामुळे ही धडक झाली. या अपघातानंतर जयश्री बोढाळे दुचाकीसह रस्त्यावर पडल्या. तसेच काही अंतर फरपटत गेल्या. त्यांचा पायाचा पंजा मोडला असून, शरीरावरही गंभीर जखमा झाल्या आहेत.

पोलिसांच्या तपासात असेही उघड झाले आहे की, दिव्येश परब याच्याकडे वाहन चालविण्याचा परवाना नाही. याप्रकरणी आशीष विठ्ठलराव बोढाळे यांनी रामनगर पोलिस ठाण्यात तक्रार दाखल केली असून, दिव्येश परब याच्याविरोधात निष्काळजीने वाहन चालवून अपघात घडवल्याचा गुन्हा नोंदवण्यात आला आहे.