तिरपण येथील वाघसदृश्य प्राणी तरस .

तिरपण येथील ‘तो’ प्राणी
तरस असल्याचे स्पष्ट

पुनाळ,ता. १८: तिरपण ( ता.पन्हाळा) येथे वारंवार दिसून येणारा प्राणी वाघ नसून तरस असल्याचे स्पष्ट झाले. गेले दहा दिवस परिसरात वाघसदृश प्राणी आल्याने लोकांच्यात भितीचे वातावरण होते. वैरण आणणे, उसाला पाणी देणे, शेतीची मशागत आदी कामे भितीमुळे खोळंबली होती.
दरम्यान, पन्हाळा वनपरिक्षेत्र अधिकारी अनिल मोहिते यांच्या मार्गदर्शनाखाली वन्यजीव बचाव टीमचे प्रदीप सुतार व सहकारी यांनी रात्री उसात ठसे मिळतात का पाहिले असता ते ठसे तरस या प्राण्याचे असल्याचे स्पष्ट झाले. रेस्क्यू टीम सदस्य प्रदीप सुतार म्हणाले, ‘आठ -दहा दिवसांपासून भागात दिसणारा वाघसदृश प्राणी वाघ नसून तरस आहे. त्याच्या पायाचे ठसे मिळून आले आहेत. तरस माणसांवर हल्ला करत नाही. तो सडलेले मांस वगैरे खातो. तरीदेखील शेतावरील वस्तीवर लहान पाळीव प्राण्यांना ठेऊ नका. त्यांच्यावर ते हल्ला करु शकतात.’